Кандидаттың қарбалас күндері

Ел президенттігіне канди­дат­тың сайлау алдындағы ала­ман додасына түсу – ауыр сын, ар мен адамгершілік өл­шемі екендігі белгілі. Бұл саяси науқан қай үміт­керге болсын үлкен жауапкершілік жүк­теумен бірге, оның өзінен зор қажыр-қайратты, ақыл-па­ра­сатты талап етері анық. Міне, осындай сынға тәуе­кел етушілердің ішінде халық генералы деп аталып жүрген Ғани Қасымовтың бет-бейнесі, ұстанған бағ­дар­ламасы біршама ерекше деп айта алар едік. Бұрнағы күні Қазақстан пре­зиденттігінен үміткер Ғани Қасымов Алматы қала­лық №17 клиникалық ауруха­на­сын­дағы сайлаушы қауым­мен – дәрігерлермен және орта буын медицина қыз­мет­кер­лерімен кездесті. Бұл кездесуде денсаулық сақтауды дамы­ту, дәрігерлер мен мейір­би­ке­лер­дің, зейнеткерлердің және халықтың басқа да қауқарсыз қалың топтарының әлеуметтік жағдайын жақсарту жөнінде үлкен әңгіме болып, мүдделі пікір алмасылды. Дәрігерлер жалақысының төмендігі, оны көбейту қа­жет­тігі туралы Ғани Қасымов өзі­нің өткенде жария еткен саяси тұғырнамасында айтқан бола­тын. Сол сөзін президенттікке кандидат тағы қайталады. Мұн­дай дәйекті уәдешілдік дәрі­герлер мен мейірби­ке­лердің көңілінен шыққан сияқты. Ауруханадағы кездесуден соң түстен кейін Ғ.Қасымов өзінің штабына жиналған жур­налистермен аз-кем әңгі­ме­ле­сіп, сұрақтарға жауап бер­ді, өзінің сайлау алдын­дағы үгіт-насихат жұмыстарының бары­сына тоқталды. Осы ретте қа­шаннан бергі тілекші досы са­найтын БАҚ өкілдеріне үлкен үміт артатынын байқатты. Президенттікке кандидаттың әлеуметтік проблемаларды шешу, әкімшілік реформалар жасау бағытындағы айтқан­да­ры ел ішінде ұнамды сілкіністер туғызып жатқан көрінеді. Осыған орай Ғ.Қасымов ал­дағы аптада сайлау алдын­дағы марафонға қатысты тағы бірнеше мәлімдеме жасай­тынын ескертті. Ғ.Қасымов өзінің сайлау алдындағы науқанына 6 миллион теңгеден астам қаржы бөлініп отырғандығын айтты. Бірақ оның қалай бөлініп, қалай жұмсалатыны партия­лық ұялар арқылы жүре­тін­діктен, қаржы мәселесінде әзір ештеңе дей алмайды. Сай­лау алдын­да­ғы үгіт-на­си­хатты қаржысы жеткен жерге дейін жүргізеді. Патриоттар партиясының 14 облыстық ко­митеті, Астана, Алматы, Қарағанды қалалық ко­митеттері, барлығы 50-ден астам ірі ұйымдары бар. Алма­тыда 3 мың, басқа облыстар мен қалаларда 200-300-ден ерік­тілер сайлаушылар арасын­дағы үгіт-насихат жұмыстарын жүргізуге көмектесуде. Президенттіктен үміткер үгіт-насихат жұмысының қар­қы­нын арттыра түсуді көздеп отыр. Бір жағы ақша үнемдеу үшін облыстарға жалғыз бар­мақшы. Бұл ретте өзінің сенім білдірілген адамдарына және, жоғарыда айтқандай, журналистерге көбірек арқа сүйейді. Сайлау алдындағы қарбалас күндерде тынымсыздық та­ныт­қан Ғ.Қасымов халыққа өз бағдарламасы ұнап жатқа­ны­на сенімді сыңайлы. Қорғанбек АМАНЖОЛ, Алматы. Суретті түсірген Берсінбек СӘРСЕНОВ.