Елбасыға өңірдегі өркенді істер көрсетілді

Кеше түстен кейін Елбасы Нұрсұлтан Назарбаев жұмыс сапарымен Оңтүстік Қазақстан облысына келді. Мұнда ол Ордабасы ауданы Бадам ауылындағы құс фабрикасында бо­­лып, кәсіпорын жұмысымен және облыстың үдемелі ин­дус­триялық-инновациялық даму бағдарламасымен танысты. Көктем түстікте өз қуатына әбден мінген екен, күннің қызуы төбе күйдіреді. Ауаның темпе­ра­ту­расы болса  16-17 градус жы­лы­лықты көрсетіп тұр. Елба­сы­ның кортежі Шымкенттен 30 шақырым жердегі Бадамға келгенде мұндағы халық жеңіл киіммен желдіріп жүр. Бүгінгі күнгі серпінді жо­ба­лар­дың бірегейі – күркетауық өндірісі. Осы шаруаны қолға алғанда біздің мамандар қай ел­дің күркетауығына таңдау сала­мыз деп бас қатырғанға ұқсайды. Тоқтағаны – Канада. Дүние­жү­зі­лік рынокта бәсі жо­ға­ры, өсімтал, еті дәмді, салмағы ауыр. Бір күркетауық 25-27 кило ет береді. Мұныңыз – екі рет қар басқан қой­дың салмағы.   “Орда­ба­сы құс” ЖШС Канададан 76 мың дана жұмыртқа сатып алған. Канададан Алматыға ұшақпен, Алма­тыдан Шымкентке ойлы-қырлы жол­­дармен салдыраған мәши­немен жеткен сол жұмыртқалардан 70 мың бас балапан жарып шық­ты. Бұл – жақсы көрсеткіш, са­палы өнім. Ордабасы ауданының Бадам ауылында орналасқан құс фаб­ри­касының құны 3 млрд. 802 млн. теңге, оның 3 млрд. 090 млн. тең­гесі «ҚазАгроҚаржы» АҚ желісі бойынша қаржыландырылған.   Бірінші кезеңдегі жаңа құс фаб­рикасының өндірістік қуаты – жылына бес мың тоннаға жуық күркетауық еті. Бұл ретте «Қаз­АгроҚаржы» АҚ сарапшы­лары­ның бағалауы бойынша, кәсіп­орын толық өндірістік қуатқа шық­қанда бюджетке түсетін қар­жы шамамен 232,3 млн. теңгені құрайтын болады. Сонымен бірге, құс фабрикасының іске қосы­луы аймақтағы кейбір әлеуметтік мәселелерді шешуге де ықпалын тигізбек. Бүгінгі таңда 270 жұмыс орны ашылған. Өндірістің да­муы­мен қатар, қосымша тағы да 230 маман жұмыспен қамтылады деп күтілуде. Айта кеткен жөн, құс фаб­рикасын салу арқасында жақын орналасқан Ұялы жар және Ын­тымақ ауылдарының тұрғындары да табиғи газбен қамтамасыз етіл­ді.  Құс фабрикасы күрке­тау­ық ұстау, өсіру және өнеркәсіптік негізде күркетауық етін өңдеу бойынша барлық халықаралық талаптарға және стандарттарға сәйкес келеді.     Елбасыға “Орда­ба­сы Құс” ЖШС директоры Мұрат Тағаев құс кешеніндегі атқарылып жатқан жұмыстарды баяндап берді. Күркетауықтың өзіндік құны – 420 теңге. Қараша айында әкелінген жұмыртқадан шыққан күркетауықтардың ал­ғаш­қы легі сойысқа түсті. Негізінен ішкі рынокқа, анығырақ айтқанда, Шымкент, Астана және Алматы қалаларына шығарылып жатыр. Сырт елдерден сұраныс бар. Қазақстан құсына Ресей көз салып отырғанға ұқсайды. Құс өсіру технологиясы Израильден алынған. Бүгін барлық технологиялық талаптар сақта­лып, ол арнаулы қондырғы арқы­лы бақыланып отырады екен. Барлық процеске қажетті жылу, жарық, ылғалдық, т.т. осы қон­дырғының бақылауында. Құс кешенін аралап, жұмысы­мен танысқаннан кейін Елбасы Н.Назарбаевқа облыс әкімі А.Мыр­захметов өңірдің әлеумет­тік-эко­но­микалық дамуы жө­нін­де баяндап берді. «Бизнестің жол кар­тасы-2020» бағдарламасы аясында облыс кәсіпкерлері мен серіктестік басшылары өз кәсіп­орындарында атқарылып жатқан жұмыстары және болашақтағы жоспарларымен таныстырды. Бұл тұрғыда облыста ауыз толтырып айтатындай баянды істер көп. Осыған көңілі тоғайған Елбасы кәсіпкерлермен сұхбатында: «Елі­мізде өз отбасын асыраймын деген азаматтарға барлық жағдай жасалып жатыр. Үкімет жеңіл несиемен қатар, ауыл шаруа­шы­лы­ғының барлық саласын субсидиямен қамтамасыз етуде. Ал, ауыл­да емес, қалада жұмыс жасаймын деген азаматтарға индустриялық кешендер дайын тұр. Көбінде жұмыс күші жетіспейді. Мұнда да мемлекет маман дайындауды өз мойнына алады, тегін оқы­та­ды. Бүгінгі заман – арқаны кеңге салып, жайбарақат жүретін заман емес, бәсекенің, білімнің, ілімнің заманы. Біздің азаматтарымыз осы­ған лайық болуы керек», – деді. Оңтүстік Қазақстан облысын­да­ғы денсаулық сақтау ісінің көңіл көншітерлік дәрежеде еместігі туралы сыни пікірлер соңғы уақытқа дейін көп айтылып келгені жасырын емес. Соның ішінде ана мен бала өлімінің көптігі туралы да жиі айтылатын. Бұл мәселені Елбасы Н.Назарбаев та қатты сынға алып, өңір басшылы­ғына жүрек-қан тамырлары сыр­қатынан, туберкулезден және ана мен бала өлімі санын азайту мәселесін шешуді тапсырған еді. Мемлекеттік бюджеттен де денсаулық сақтау са­ласына бөлінетін қаражат кө­ле­мі еселеп арттырылған. Соның ар­қа­сында қазір Шымкент қала­сы­ның өзінде 3 перинаталдық ор­талық­тың қызмет етуіне жағдай жа­салған. Осының үстіне 3 жыл бұ­рын Елбасы жеке өзі тара­пынан Біріккен Араб Әмір­лік­те­ріне өті­ніш жасап, Халифа бен Зайд әл Нахаян атындағы қайы­рым­дылық қорынан Шымкент қаласына тағы бір жаңа пери­на­тал­дық ор­та­лық құрылысын салғызуға қол жеткізді. Сөйтіп, қазір Шымкент­тегі ана мен бала орталығының саны төртеуге жетті. Бұл жыл сайын бала туу санын 70 мыңға жеткізіп, елімізде дү­ниеге келген барлық шарананың төрттен бірін құрап отырған өңір үшін аса үлкен қажеттілік еді. Жуырда, сол перинаталдық ор­талықтың ашылу салтанаты бол­ған. Міне, сол орталықты көріп, жұмы­сы­мен танысу үшін кеше Н.Назарбаев осында келді. Бұл орталық Шымкенттің «Нұр­сат» атты жаңа шағын аудандарының бірінде ашылған. Жобаның құны 25,5 млн. АҚШ долларынан асады және ол тұ­тасымен, жоғарыда айтқ­аны­мыз­дай, Шейх әл Нахаянның қоры­нан қаржыландырылды. Құры­лыс­ты жүргізген қазақстандық «Эристайл-Казахстан» ЖШС. Облыстық көлемінде жұмыс істейтін ол 120 орынға жасақ­талған. Соның ішінде бала туу бөлімі 80 орынға шақталған. Оның 12 орны үлкендерге ар­налған, 9-ы бөбектерге арналған  жансақтағыш орындары. Жоғары дәрежеде жетілдірілген емдеу жабдықтарын алу үшін 5,5 млн. АҚШ доллары көле­мін­де қаражат жұмсалған. Соның ішінде ультрадыбысты сканерлері бар сандық жабдықтар Жапониядан алыныпты. Ал жоғары жиілікті жылжымалы рентген қондыр­ғы­сы Италиядан әкелініп­ті. Мұндай жабдықтарды орта­лық қалалар­дан да табу қиын екен. Орталықты аралап шыққан соң Президент қызметкерлермен сөйлесті. Ондағы сөзінде Н.Назарбаев ана мен бала денсаулы­ғына мемлекеттің жыл сайын қам­қорлығы арта түсетінін айт­ты. Басқа да әлеуметті сырқат түрлеріне қарсы білікті шаралар ұйымдастырылуда, соның арқа­сында адам өлімінің азайғанын жеткізді. Жиналғандар атынан сөз алған сауықтандыру орталығы­ның бас дәрігері Ташбибі Ты­ныш­тықбаева адам денсаулығын сақтауға жасалып жатқан әрекет­тер үшін ризашылығын білдірді. Ал Литва университетінен келген маман Антанас Пужас Қазақ­стандағы адам денсаулығын жақ­сартуға, соның ішінде ана мен бала өлімін азайту ісіне бай­ланысты жасалып жатқан шара­ларға өзінің көңілі толатынын жеткізді. Президент кортежі ұзап кеткенше аналар сәбилерін құшақ­тап, ұзақ уақыт бойы тарамай, терезеден қарап тұрды. Бүгін Президенттің са­па­ры Түркістан қаласында жалғасады. Жақсыбай САМРАТ, Бақтияр ТАЙЖАН, Шымкент. Суретті түсіргендер С.БОНДАРЕНКО, Б.ОТАРБАЕВ.