БҚО бюджеті қанша теңге?

Батыс Қазақстан облысының бюджеті 3,2 млрд. теңгеге нақтыланып, кірістері мен шығыстары бойынша 134,7 млрд. теңгеге жетті. Бұл туралы бүгін облыс әкімі Алтай Көлгіновтің қатысуымен өткен облыстық мәслихаттың кезектен тыс 7-сессиясында айтылды, деп хабарлайды ҚазАқпарат. Онда облыстық экономика және бюджеттік жоспарлау басқармасының басшысы Қайсар Маңқараевтың мәлім еткеніндей, өңір бюджетінің осынша көлемде нақтылануы республикалық бюджет пен Ұлттық қордан қосымша бөлінетін 1698,9 млн. теңгенің мақсатты трансферттеріне, облыстық бюджет кіріс болжамының 677,6 млн. теңгеге түзетілуі және бюджеттік бағдарламалар әкімшілері арасында 877,2 млн. теңге қаражаттың қайта бөлінуіне байланысты болып отыр. Соның ішінде мақсатты трансферттер есебінен 2013-2020 жылдарға арналған «Агробизнес - 2020» бағдарламасы аясында агроөнеркәсіп кешенін қолдауға - 1028,8 млн. теңге, газ тасымалдау жүйесін дамытуға - 700 млн. теңге, мектептерді салу мен қайта құруға 293,2 млн. теңге берілмек. Есесіне «Өңірлерде жеке кәсіпкерлікті қолдау» бағдарламасы бойынша трансферттер 681 млн. теңгеге азайтылды. Сонымен қатар облыстық бюджеттен денсаулық сақтауға 11,9 млн. теңге, ауыл шаруашылығына 20,3 млн. теңге, мәдениет пен спортқа 99,5 млн. теңге, тұрғын үй-коммуналдық шаруашылық саласына 475,5 млн. теңге қосымша қаржы бөлінбек. «Жұмыспен қамтудың жол картасы - 2020» бағдарламасы аясында алты бірдей нысанды күрделі жөндеуге 236,8 млн. теңге қаралды. Атап айтқанда, бір-бірден білім беру мен денсаулық сақтау нысандары, Зеленов, Қазталов, Теректі аудандарында жол жөндеу бойынша төрт жоба қаржыландырылды. Оған қоса құрылысы басталған нысандарды салуға 204 млн. теңге жұмсалмақшы. Сессияда Елбасы Жарлығына сәйкес облыс әкімі Алтай Көлгінов депутаттар алдында есеп беріп, тәуелсіздігіміздің 25 жылдығы тойланатын биылғы жылдың он айында өңірдің әлеуметтік-экономикалық дамуында оң көрсеткіштер бар екендігін атап көрсетті.