Қытай кәсіпкерлері Қазақстандағы омарта шаруашылығының дамуына қызығушылық танытуда. Соның бір айғағы ретінде ҚХР Ауыл шаруашылығы министрлігі сапа инспекциясы және карантин жөніндегі бас басқарма төрағасының орынбасары Мей Кебао жетекшілік еткен делегацияның Аршалы ауданына арнайы келуін айтуға болады. Көрші елдегі іскер қауым өкілдерін Қазақстан Республикасы Ауыл шаруашылығы вице-министрі Гүлмира Исаева мен аудан әкімі Азамат Тайжанов қарсы алды.
Қонақтар Ақмола облысына әйгілі әрі бай тәжірибе иесі Анатолий Добровольскийдің Бабатай темір жол стансасындағы омарта шаруашылығында болып, атқарылып жатқан істермен танысты. Шаруашылық иесі А.Добровольский бал жинау жұмысы жайлы жан-жақты әңгімелеп, қытайлық әріптестерімен тәжірибе бөлісті.
Сондай-ақ, кездесу барысында елге белгілі омарташылар Сандықтау ауданындағы Балқашын кентінен келген Станислав Богомолов пен Аршалы ауданындағы Ижев ауылының тұрғыны Юрий Лагутин өз кәсіптерінің қыр-сыры мен болашағы жайлы егжей-тегжейлі айтып, қойылған сұрақтарға толымды жауаптар қайтарды.
Аудандағы омарта шаруашылығының ұйымдастырылуымен танысып, дайын өнімнен дәм татқан қонақтар Ақмола балының ерекшелігі мен сапасына жоғары бағасын берді. Өзара түсіністік ахуалындағы пікір алмасу барысында Мей Кебао мырза Ақмола балына Қытай тарапынан қызығушылық барын атап көрсетіп, алдағы уақытта бағалы өнімді жеткізу мәселесіне мүдделілік білдірді. Келісімшарттар рәсімдеу күні де алыс еместігі байқалды.
– Елімізде омарта шаруашылығын дамытуға ерекше көңіл бөліне бастағаны қуантады, – деді бізбен әңгімесінде А.Добровольский. Ауыл шаруашылығы министрлігі де осынау пайдалы салаға қолдау көрсетуде. Бұл дегеніңіз жаңа жұмыс орындары, нарыққа табиғи таза өнім шығару әрі ел экономикасына қосымша капитал тарту болып табылады.