Зілзала Жапонияны есеңгіретіп кетті

Жапонияның ең ірі Хонсю аралында алапат жер сілкінісі тіркелді. Оның күші, кейбір деректерге қарағанда, 8,9 баллға жеткен. Зілзаланың эпицентрі Тынық мұхитының түбінде орналасыпты. Осының салдарынан биіктігі 10 метрге дейін цунами көтерілген. Ел астанасы Токионың өзінде 4 мыңдай ғимарат қираған. Зіл­заладан опат болғандар саны әзірше белгісіз. Алып толқындар жағалауға жақын маңдағы елді мекендерді шайып кеткен. Енді цунами Оңтүстік-Шығыс Азияның бірқатар елдеріне және Авс­тралияға қауіп төндіруі ықтимал. Көптеген тұрғындар қауіп­сіз жерлерге көшірілуде. Ресей Ауғанстанға тікұшақтар сатады Ресей мен НАТО Ауғанстанға 24 көп­мақ­сатты МИ-17 тікұшақтарын сату туралы уағдаластыққа қол жеткізді. Ке­лісім-шартқа осы жылдың наурыз айының аяғына дейін қол қойылады деп күтілуде. Келіссөз үдерісінде НАТО тарабынан АҚШ өкілеттілік етті. Сөйтіп, Ресей жағы Ауғанстанға 24 тікұшақ сататын болса, тағы үшеуін тегін бермек. Қаржы НАТО-ның арнайы қорынан төленеді. Бұл қор таяу болашақта құрылатын болып белгіленген. Оған альянсқа мүше мемлекеттердің барлығы жеке-жеке жарна енгізулері тиіс. Осылайша Ауғанстанның әскери-әуе күштеріндегі Ресей әуе кемелерінің саны 100-ге жетпек. Саудияда митингілетуге рұқсат жоқ Сауд Арабиясының Әл-Катиф қаласында бейсенбі күні кешкісін демонстрацияға шыққан 3 адам жарақат алды. Митингке шығушылар шииттердің өкілдері болып табылады. Жалпы, аталған қаланың көшелеріне, араларында әйелдер де бар, шамамен 800 шиит шыққан екен. Олардың талаптары – біреу: қамауға алынған шиит өкілдерін босату. Митингке шыққандарды қуып таратуға 200-дей полиция қызметкері қатысқан. Олардың айтқандарына бағынбағандарға қарсы оқ атылған. Үстіміздегі жылғы наурыз айының басынан Саудия ішкі істер министрлігі елде демонстрацияға шығуға тыйым салған болатын. Ведомстводағылардың айтуларынша, митингтер шариғатқа қайшы келеді. Бұл тыйымның басқа, яғни басты астары бар екені де түсінікті. Ресейге деген көзқарас Ұлыбританияның радиохабарларын тарататын ВВС кор­порациясына қарасты GlobeScan компаниясының сарапшылары өздері жүргізген сұрау салулардың кезекті нәтижелерін жария етті. Әлемнің 27 мемлекетінде жүргізілген сұрау салулар бо­йынша респонденттер Ресейдің әлемге ықпалы жөніндегі көз­қарасын бұрынғысынша терістеу  күйінде қалдырған. Ресейге оң көзқарас танытқан елдер қатарында Үндістан,  Қытай, Оңтүстік Корея бар. Ал аса оң бағамға ие болған ел Германия болып отыр. Ең теріс баға алған мемлекет Иран болып табылады. Бұл ел  былтыр да көш басында тұрған екен. Сондай-ақ әлемге теріс ықпалды мемлекеттер қатарында Пәкстан, Корея Халық-Демократиялық Республикасы және Израиль аталған. АҚШ-қа қатысты көзқарас екіұдай.