Аралда сапалы қайық шығарылады

Қызылорда облысының Арал ауданында жас кәсіпкер шыны пластиктен ескекті қайық шығаратын кәсіпкорынды іске қосып, өндірісті жөнге қойды, деп хабарлады ҚазАқпарат. Осыдан екі жыл бұрын кәсіпкер Жансерік Нысанбаев «Бизнестің жол картасы 2020» мемлекеттік бағдарламасының тиімділігін пайдалана отырып, корпусты қатқыл жиһаз шығаратын цех ашқан болатын. Бүгінде ол кәсібін кеңейтіп қана қоймай, оны әртараптандыруға мүмкіндік алып отыр. Нақты айтқанда «Қазақстан халық банкінен» 13,5 млн теңге несие рәсімдеп, «Даму» Қорының 44 пайыздық кепілдендіруімен жаңа жобаны жүзеге асырды. «Арал ауданындағы халықтың негізгі қызметі балық шаруашылығы болғандықтан, қайыққа деген сұраныс үнемі жоғары деңгейде. Сондықтан да біз айына 3 қайық жасап шығарылудамыз. Жиһаз жасау саласында тәжірибем болғандықтан, мен шыны пластиктен қайық жасау туралы ғаламтордан алған мәліметтерді тез ұғындым. Белгілі болғандай, әдісін тапсаң, сапалы қайықты жасау аса қиын емес екен. Шыны пластиктен шыққан қайықтар өте жеңіл, бірақ мықты болып келеді. Оларды ағаш пен металлдан жасалған қайықпен салыстырғанда әлдеқайда көп мерзім пайдалануға жарайды», – дейді кәсіпкер Жансерік Нысанбаев. Өндірісті кеңейтудің нәтижесінде кәсіпкер қосымша 3 жаңа жұмыс орнын ашып, қарамағындағы жұмысшылар санын 10-ға жеткізді. Шағын кәсіпорын тек жоғары сапалы өнім шығаруға бағытталған, сондықтан да жасалу кезінде әрбір тетігіне аса мән беріледі. Жансерік Нысанбаевтың айтуынша, мықтылығы мен сапалылығы ескеріліп, қайықтың бағасы қолжетімді деңгейге сәйкестендірілген. Айта кетейік, жас кәсіпкер кәсіпорнына қосымша қаржы тарту мақсатында «Даму» Қорының кепілдігімен ЕДБ несие алу үшін құжаттар жиынын дайындау үстінде. Несие қаражатының көмегімен ол моторлы қайық шығаруды және өндіріс көлемін арттыруды қолға алмақшы.