Кеше Қазақстан Республикасының Орталық сайлау комиссиясында халықаралық байқаушылар үшін «ЕҚЫҰ елдерінде мүмкіндіктері шектеулі және қарт адамдардың электораттық құқықтарын іске асыру жағдайын байқау ерекшеліктері» деген тақырыпта семинар-тренинг өтті.
Семинар жұмысына Астанадағы ЕҚЫҰ бағдарламалық офисінің, ЕҚЫҰ-ның Демократиялық институттар және адам құқықтары жөніндегі бюросының, еліміздің орталық мемлекеттік органдарының, министрліктердің және ведомстволардың, сондай-ақ үкіметтік емес ұйымдардың өкілдері қатысты. Іс-шараның ашылуында Орталық сайлау комиссиясының хатшысы Бақыт Мелдешов пен Астанадағы ЕҚЫҰ бағдарламалық офисінің басшысы, елші Дьердь Сабо құттықтау сөз сөйледі.
«Бүгінгі біздің семинар-тренингіміз ЕҚЫҰ-ға қатысушы елдерде мүмкіндіктері шектеулі және қарт адамдардың электораттық құқықтарының сақталуын байқауға арналған, деді Б.Мелдешов құттықтау сөзінде. – ЕҚЫҰ-ның адами өлшемі жөніндегі Мәскеу кеңесінің 1991 жылғы 3 қазандағы құжатының 41-параграфында мүгедектігі бар адамдардың адами құқықтарын қорғауды қамтамасыз етуге, олардың қоғам өміріне толық қатысуына, мүгедектерге қатысы бар салаларда шешімдер қабылдауға мүмкіндік беруге және олардың қоғамдық ғимараттарға қол жеткізуі үшін қолайлы жағдайлар жасау міндеттері бекітілген. Біз осы ережені іске асырудың тетіктері, мүгедектер мен қарт адамдардың сайлау құқықтарының сақталуын байқауды ұйымдастырудың әдістері мен нысандары туралы сөз етеміз».
Бұдан соң Орталық сайлау комиссиясының мүшесі Марат Сәрсембаев ЕҚЫҰ-ға қатысушы мемлекеттердегі мүгедектердің электораттық құқықтары жөніндегі заңдардың салыстырмалы-құқықтық талдауының нәтижелерін ұсынды. Семинар аясында, сондай-ақ ЕҚЫҰ-ның Демократиялық институттар және адам құқықтары жөніндегі бюросының кеңесшісі Радивое Груичтің «ЕҚЫҰ елдерінде мүмкіндіктері шектеулі және қарт адамдардың электораттық құқықтарының іске асырылу жағдайын байқаудың ерекшеліктері» атты зерттеуінің тұсаукесері де болды.
Шара барысында Молдова Республикасындағы мүгедектер мен қарттардың электораттық құқықтарының мәселелеріне байланысты ОСК аппараты халықаралық қатынастар бөлімінің меңгерушісі А.Арғынов хабарлама жасады. Ал «Ардагер» қоғамдық бірлестігінің өкілі Д.Жігітова сайлауға қарт адамдардың қатысуын қамтамасыз ету мәселелері жөнінде қатысушылармен ой бөлісті. Сонымен қатар, қатысушылар халықаралық ұйымдардың миссияларының құрамында сайлауды халықаралық байқаудың ерекшеліктерін талқылады және Қазақстан өкілдерінің 2016 жылы ЕҚЫҰ/ДИАҚБ миссиясының құрамында сайлауды байқауға қатысу тәжірибесімен танысты.
Тренинг соңында 2017 жылы Қазақстан Республикасынан ЕҚЫҰ/ДИАҚБ миссиясының құрамында байқаушылардың қатысу тәжірибесін әрі қарай жетілдіру және дамыту мәселелері жөнінде пікір алмасылды.
Әлисұлтан ҚҰЛАНБАЙ,
«Егемен Қазақстан»