Кандидат халық арасында

Президенттіктен үміткер Ғани Қасымов өткен демалыс күндерінде де тыным таппай, сайлаушылармен бірқатар кездесулер өткізді. Оның штабына күн сайын өз проблема­ла­ры мен арыз-шағымдарын айтып он­даған алматылықтар келуде, өзде­рінің тіршілік түйткілдерін шешу жөнінде көмек көрсетуді сұрауда. Үміткердің сайлауалды штабы, со­нымен бірге, кандидаттың саяси тұғыр­намасымен егжей-тегжейлі танысқысы және Патриоттар партиясына өткісі келетіндерді де ықыласпен қарсы алуда. Осы күндерде бес адам оның белсенді жақтаушысына айналды. Солардың ішінде №109 орта мектептің қазақ тілі мұға­лімі Нұргүл Жекебаева да бар. «Маған президенттіктен үміткердің мемлекеттік тілді дамыту орайындағы көзқарастары ұнайды. Ол мұғалімдерді, бюджеттік сала қызметкерлерін әлеуметтік жа­ғы­нан қорғауға үлкен көңіл бөлген», – дейді Н.Жекебаева. Ғани Қасымов өзі­нің жаңа жақтасына салтанатты жағ­дайда партия билетін тапсырып, әсем гүл шоғын сыйлады. Сайлаушылардың көңіл күйін жақ­сы­рақ біліп, өз тұғырнамасының арқау-қағидаттарын оларға ұғынықты жеткізу үшін Ғани Есенгелдіұлы қалалықтар­дың үйлеріне де кіріп шыққанды жөн көрді. Ғанекеңді Әбеновтердің ынты­мақ­ты отбасы өз пәтерінде жаймашуақ қарсы алды. Отағасы Дамир Кәрімұлы – республиканың еңбек сіңірген сәу­лет­кері. Ол Медеу мұз айдынын, көптеген тұрғын үй және мейманхана кешендерін, сондай-ақ Алматыдағы, Астана­дағы, Түркістандағы, Жаңатастағы бірегей нысандарды жобалауға қатысқан. Оның ұлы Абай да әке жолын қуған сәулеткер екен. Отанасы Ғалия Бей­се­н­байқызы – профессор, Орталық Азия университеті инженерлік-техно­логия­лық факультетінің деканы. Шәй үстінде Алматының және еліміздің басқа қалаларының сәулеті, сәулеткер кадрларды даярлау туралы әңгіме өрбіді. Дамир Кәрімұлы отан­дық талантты мамандардың, әсіресе жас­тардың шет елге кетіп жатқанына өкініш білдірді. Ғани Есенгелдіұлы біздің тарихы­мыз­дың, руханиятымыздың, тіліміз бен мәдениетіміздің қайнар бұлағы болып табылатын  ауылды көтеруді шындап қолға алу қажеттігіне тоқталды. Ол кең-байтақ жерімізде ұжымдық шаруа­шылықтар құрмайынша, мемлекет қар­жы­сының көмегі берілмейінше ауылды көтеру мүмкін емес деп есептейді. Сол үшін де өңдеуші өнеркәсіпті дамытып, нығайту керек. Жастардың ауылдан кетіп қалмауы үшін жас отбасыларға тегін жер телімдерін беріп, шаруашылық жүр­гізу үшін пайызсыз несие бөлген абзал. Ғ.Қасымов бұдан соң қала көшеле­рінде өз сайлаушыларымен емін-еркін араласып, емен-жарқын әңгімелесті. Жексенбі күні Жібек жолы көшесі бойындағы «Алматы Арбатында» болды. Алматы Арбатында серуендеп жүрген қалалықтар президенттіктен үміткерді танып, амандасып, оған алдағы сайлауда табыс тіледі. Қорғанбек АМАНЖОЛ. Алматы. ------------------------------------ Суретті түсірген Берсінбек СӘРСЕНОВ.