Егер «Қазақстан» ұлттық арнасындағы «Айгөлек» байқауының күнделігін көріп жүрген болсаңыз, сондағы Еркеш есімді сүп-сүйкімді балақайға бірден назарыңыз түсері даусыз. Бойындағы әртістік қабілеті мен балалық шынайы пейілі арқылы көрермендердің ықыласын жаулап алған Еркеш осы байқаудың жүргізушісі. «Айгөлектің» бұдан алдыңғы жобаларының бірінің жеңімпазы. Тұп-тұнық дауысы мен музыкалық талғамы бар өнерлі бала. Жуырда біз Еркештің Ресейдің 1-ші арнасы ұйымдастырған ең таңдаулы жобаларының бірі «Минута славы» бағдарламасында суперфиналға өткенінен хабардар болдық. Редакциямызға әдейі ат басын бұрған ҚР еңбек сіңірген әртісі, әнші әрі сазгер Марат Омаров өз шәкіртінің өнердегі жетістігі туралы толғана баяндады: «Еркешті осыдан үш жыл бұрын «Балбөбек» байқауына қатысып, бас жүлде алған кезінен бастап білемін. Содан алдымен сырттай бақыладым. Алғашқы әсер алдамшы бола ма деген де ой ғой. Сөйтсем, олай емес. Неше түрлі концерттерге қатысып жүрген баланың дауысы шынында да табиғи, диапазоны кең. Қазақ «бұлақ көрсең көзін аш» демей ме? Сонау Ақтөбенің Хромтау ауданынан шыққан жеткіншекті шәкіртім ретінде тәрбиелеуге бел будым. Әрі анасынан жастай айырылып, әпкесінің қолында тәрбиеленіп жатқан балаға ерекше ықыласым ауды. Міне, жетістігіміз жаман емес. Еркеш суперфиналға өту арқылы Ресей мен шетелдіктер бірігіп түсіргелі жатқан көп сериялы фильмде баланың рөлін сомдауға ұсыныс алды. «Минута славы» бағдарламасы жасөспірім мен жасамыс та қатыса алатын шоу. Бірақ, оған қатысу оңай шаруа емес. Қатысушылар да, қазылар да әлемдік деңгейде сараланады. Соның ішінен суперфиналға жолдама алу үшін шын мәнінде талантты болу керек. Өйткені ол ақша беріп ат жасайтын жер емес. Бәрі көрерменнің көз алдынан өтіп жатады. Көрермен өзі де SMS арқылы дауыс береді».
Қазақ қоғамы Марат Омаровтың балалар үшін неше түрлі байқаулар ұйымдастырып, одан қалса талантты балаларды тауып, олардың өнердегі жолын ашып жүргенінен хабардар. «Әнші балапан», «Балбөбек» арқылы танымал болған балалар осы күндері талантты жастардың қатарында жүр. Жуырда ғана «Айгөлек» байқауында бас жүлде алған Мейірлан Шәкенов пен жүлделі орыннан көрінген Мәдина Ералиева есімді 8 жасар қыз бала да сазгердің шәкірттері. Ол өзінің арманы шәкірт тәрбиелеу екенін, олар тек қазақстандық сахнада емес, әлемдік сахналарда ән шырқаса деп тілейтінін жасырмады. Сол үшін де елордамыздан халықаралық «Талант» өнер орталығын ашыпты. Бұл орталыққа нағыз табиғи дарыны бар талантты балаларды топтастырғысы келетін сазгер ағамыз оларды еліміздің шалғай ауылдарынан іздеуге де бейіл. Айта кетейік, бұл орталық ресми түрде 23-ші наурызда ашылатын болғанымен, Еркеш Хасенді орталықтың алғашқы қарлығашы деуге болады. Өйткені, ұстазы шет елдермен байланыс жасауды бастап та кеткен. Әрине, «Минута славы» жобасына қатысудың мүмкіндігі оп-оңай бола қоймайды ғой.
Айгүл СЕЙІЛОВА.