18 Наурыз, 2011

Жүйрік ат, алғыр қыран, ұшқыр тазы...

517 рет
көрсетілді
1 мин
оқу үшін
Жақында «Саят» ұлттық спорт түрі бойынша «Ең алғыр қыран» атты құсбегілердің республикалық жарысы болып өтті. Жамбыл ауданындағы Айша бибі ауылында өткен құсбегілер бәсекесіне Ақмола, Алматы, Ақтөбе, Аты­рау, Қарағанды, Оңтүстік Қазақстан және Жамбыл облысынан 25 бүркітші қатысты. Бәсекеде ақтөбелік Қозыкөрпеш Майдәулетұлы «Ең алғыр қыран» иесі атанды. Ол бүркітті шақыру, шырға тарту, түлкіге салудан алдына саятшы сал­дыр­мады. Екінші орынға алматылық Қуаныш Исабеков, үшінші орынға Оңтүстік Қазақстан облысынан келген құсбегі Бағдат Кеуенов ие болды. Ал қаршыға салуда жамбылдық жас саятшы­лар­дың бағы жанды. Жамбыл ауданындағы Өрнек ауы­лын­да тұратын Бауыржан Ешметов атты қария ата-баба өнерін ұрпақтарына жалықпай үйретіп жүр екен, жеңімпаз да, міне, солар болып шықты. Жас саят­шылар Шернияз, Тұрнияз және Ғазизхандар атасының саятшылық өнерін өте шебер меңгеріп алыпты. Ғазизханы, тіпті, 6 жасқа енді толыпты. «Саят» ұлттық спорт түрі бойынша дәстүрлі түрде өткізіліп келе жатқан құсбегілер бәсекесінің басты мақсаты – ұлттық саятшылық өнерін қайта дамыту болып табылады. Өйткені, халқымыздың салт-дәс­тү­ріне берік орныққан саятшылық өнердің бұқаралық сипат алуы бүгінгі жаһандасу дәуірінде өте маңызды. Ел тәуелсіздігінің 20 жылдығы құрметіне арналған құсбегілер жарысының қорытындысы бойынша же­ңім­паздар мен жүлдегерлерге Туризм және спорт ми­нистрлігінің дипломдары мен медальдары салтанатты жағдайда табыс етілді. Көсемәлі СӘТТІБАЙҰЛЫ. Жамбыл облысы, Жамбыл ауданы, Айша бибі ауылы.