«Кеніштен» шыққандар кенде қалмайды

«Ел іші – өнер кеніші» деген рас қой. Ауыл-аймақтарда қаншама өнерлі жастар табиғи талантын жарқырата алмай, тасада қап жатқаны белгілі. Біреуінде жағдай жоқ, тағы бірінде қолдау жоқ. Сондықтан Жамбыл жеріндегі жаңа, жас талант иелерін анықтап,  насихаттау, олардың шығармашылық шеберлігінің шыңдалуына қолдау көрсету мақсатында биылғы жылдың басында «Жаңа есім-2016» кастингі жарияланған болатын. Эстрада, дәстүрлі орындаушылар, музыка аспаптары, айтыс ақындары бойын­ша өткен бұл байқаудың алғашқы кезеңінде ауыл-аймақтардан барлығы 300-ге жуық өнерпаз қатысыпты. Соның ішінен 42 үміткер суырылып шығып, екінші кезеңнен кейін жетеуі үздік деп танылды. Міне, осы­лайша Ғабит Бірімқұл (Шу ауданы), Сейілғазы Тәңірберген (Жамбыл ауда­ны), Жансая Сәрсенбаева (Т.Рысқұлов ауданы), Ами­­на Ибрагимова (Жам­был ауданы), Әсел Сүндет (Жам­был ауданы), Әділет Тұраров (Тараз), Нұрдәулет Қойшыманов (Байзақ ауда­ны) арнайы дипломмен және «Жаңа есім-2016» ата­лымы белгісімен марапат­талды. – Бұл әншілерге арнайы тәлімгер тағайындалып, оларды сахнаға дайындау, репертуар таңдау, жаңа әндерге тапсырыс беру үшін сазгер мен ақындар іздестіру, аранжировка, жаңа есімдердің имиджін қалыптастыру жұ­мыстарын атқаратын болады, – дей­ді Жамбыл облыстық мә­дениет, архивтер және құ­жат­тама басқармасы ха­лық шығармашылығы орта­лы­ғының директоры Ғани Садырбаев. «Жаңа есім-2016» жеңім­­паздары арнайы ұйым­дас­тырылған гала-концертте өз өнерлерімен қалың көрер­мендерді тәнті етті. Тағы бір айтары, осы жоба­ға арнайы «Жаңа есім» әнін жазған сазгер мен жеңім­паздар орындаған жаңа әндердің авторлары қонақ ре­тінде шақырылып, халық қошеметіне бөленді. Оралхан ДӘУІТ, «Егемен Қазақстан» Жамбыл облысы