Қостанайда дүңгіршек тонағандар жарты сағатта ұсталды

Қостанай қаласының орталығындағы азық-түлік сататын дүңгіршекке екі жігіт кешкі апақ-сапақта кіріп келіп, сатушыға күш көрсетіп, буындырамыз деп қорқытып, ұялы телефонын және сол күні саудадан түскен 115 мың теңгесін сыпырып алып кеткен. Сатушы қыз ұрылар шығысымен дереу «102» телефонына хабарлайды. Дүңгіршекке жедел жеткен сержанттар Алмас Сафин мен Достан Исмағұлов тонаушылардың түр-тұлғасы мен киімін сатушы айтып берген соң-ақ, олардың кім екенін бағамдайды. Өйткені, қырағы полицейлер күндіз патрульде жүргенде жүрісі күдікті екі жас жігітті байқаған болатын. Сатушының суреттеген ұрылары сол екі жігітті бірден еске түсірді. Полицейлер әлгі екі жігітті жарты сағаттың ішінде ұстады. 1990 жылы туған екеуі бұрын бірнеше сотталып үлгерген, облыс орталығында тұрады, еш жерде жұмыс істемейді. Ал аға сержанттар бұдан бұрын да қауіпті қылмыстардың бетін ашқан болатын. Нәзира Жәрімбетова, «Егемен Қазақстан»