Джейкобс Головкинге қарсы қандай әдіс қолданатынын айтты

Орта салмақта WBA (Regular) белбеуінің иегері Дэнниэл Джейкобс Геннадий Головкинге қарсы жекпе-жегіне арнаған жоспары жайлы бөлісті. Бұл туралы sports.kz хабарлады. «Головкинге қарсы кездесу мансабымдағы ең ауыр айқастардың бірі болайын деп тұр. Бұған дейін жеңіліп көрмеген спортшымен жекпе-жекке шығатыныма қуаныштымын. Маған ешнәрсе оңай келген емес. Жұрттың бәрі оңай жағын қарастырғанда мен қиындықтарды жеңуге ұмтылатынмын», – деді америкалық боксшы. «GGG жылдам қозғалмағанмен, оған дәл соққы жасау қиындау. Оның ең жақсы тұстары? Геннадий мықты спортшы, әсіресе джеб соққылары дәл тиер болса, есеңгіретіп жіберуі мүмкін. Ал жоспарым бойынша оның дәл осы тұстарына тойтарыс беруім қажет. Бұл үшін не істеу керектігін жақсы білемін», – деді Джейкобс.