Головкин мүсінге айналды

Ол кәсіби мүсінші емес. Бірақ саз балшықтан мүсін жасау Қайсар­дың бала күннен сүйікті ісі. Жа­қын­­да ғана ол белгілі кәсіпқой бокс­­шы, орта салмақтағы әлем чем­­пио­ны Геннадий Головкиннің мүсі­­нін жасады. Алдымен оны саз бал­­шық­тан ойып, онан кейін пласт­­мас­са­дан құйған. Мүсіннің күміс және алтын түстес бояу­л­ар­мен боялған екі түрін дайындады. – Мүсін столдың үстіне қоюға, кәде­сый ретінде жасалды. Оның биіктігі 17 сан­тиметр, салмағы 600 грамм. Үл­кей­ту­ге де болады, – дейді Қайсар Нұғыманов. Кішкентай ғана мүсіннен білегі­нің бұлшық еті ойнап, жеңісіне, жан­күйер­лердің сенімін ақтағанына марқайған Генаның жүзін көреміз. – Головкин асқан талантты спорт­шы. Ол жастарға, оның ішінде қазақ жас­тарына керемет үлгі. Гена өзін тек қазақ­­стан­дықпен деп қана қоймайды, қазақ­пын дейді. Сұхбат бергенде ара­сында қазақ сөзін қосып қояды, бұл оның еліне деген құрметі, – дейді Қайсар. Бұл мүсінші жігіттің бірінші жұмысы емес. Ол бұған дейін әл-Фарабидің, Муам­мар Каддафидің, Бенджамин Франк­лин­нің және тағы басқалардың мүсінін ойды. Қайсар қазір Қазақстанның Тұңғыш Президенті Нұрсұлтан Назарбаевтың мүсінін жасауға кірісіпті. Ол алдағы уақытта қазақ халқының қайраткер, кемең­гер перзенттері мүсіндерінің жиын­тығын жасауды мақсат тұтып отыр. – Халқымыздың тамаша тұлғалары көп, оларды Елбасынан бастадым. Олар­дың арасында Рейхстагқа ту тіккен Рақым­жан Қошқарбаевтың мүсіні міндетті түрде болады. Ол мүсіндерді мектептерге таратуды да армандаймын. Мысалы, Екінші дүниежүзілік соғыста Рейхстагқа тұңғыш ту тіккен қазақ екенін әлем білуі керек, – деп толғанады Қайсар.  Нәзира ЖӘРІМБЕТОВА, «Егемен Қазақстан» ҚОСТАНАЙ