Мақсат орындалған сапар

Қазақстан Республикасының Сыртқы істер министрі Қайрат Әбдірах­мановтың Нью-Йоркке жұмыс сапары мәресіне жетті, деп хабарлады Қазақстан Республикасы сыртқы саясат ведомствосының баспасөз қызметі. Қазақстандық министр өзінің Америка Құрама Штаттарына жұмыс сапарының соңғы күні Нью-Йорк қаласында Орталық Азия елдері мен Ауғанстанның БҰҰ жанындағы Тұрақты өкілдерімен кездесу өткізді. Қазақстан сыртқы саясат ведомство­сының басшысы аталған басқосу барысында еліміз БҰҰ Қауіпсіздік Кеңесінің тұрақты емес мүшесі ретінде Ұйым тарихында алғаш рет Орталық Азия өңірінен өкілдік етіп отырғанын атап көрсетті. Сондай-ақ, ол Қазақстанның Орталық Азияның барлық елдерінің ортақ мүддесі үшін күш-жігер жұмсайтынын көлденең тартты. Атап айтқанда, Қ.Әбдірахманов Ауғанстанның шетін проблемаларын түбегейлі шешпей тұрып, өңірде ұзақ мерзімді тұрақтылық пен қауіпсіздікті қамтамасыз ету мүмкін емес екеніне назар аударды. Өз кезегінде, өңір мемлекеттерінің дипломаттары Қазақстанның Орталық Азия елдерінің мүдделерін БҰҰ Қа­уіп­сіздік Кеңесіндегі мүшелігі арқылы ілгерілету жөніндегі жоспарларына қолдау білдіретіндіктерін мәлімдеп, саяси және сарапшылық деңгейлерде тиісті конструктивті өзара іс-әрекеттерді жал­ғастыруға дайын екендіктерін қуаттады. Бұдан бөлек, кездесуде Қазақстан Рес­публикасының Президенті Нұрсұлтан Назарбаевтың БҰҰ Қауіпсіздік Кеңесіне Саяси үндеуі оң бағаланды. Сапары барысында, сондай-ақ, Қ.Әб­дірахмановтың Италия, Швеция, Эфиопия, Польша және Латвия сыртқы саясат ведомстволары басшыларымен, Ұлы­британия Сыртқы істер министрінің орын­басарымен екіжақты жұмыс кезде­сулері өтіп, оларда екіжақты қарым-қаты­нас мәселелері бойынша және БҰҰ-ның күн тәртібі жөнінде жемісті пікір алмасулар болды. Тұтастай алғанда, қайта тағайын­дал­­ған Қазақстан Сыртқы істер ми­нистрі­­нің алғашқы халықаралық сапары табыс­ты аяқталды деп айтуға толық негіз бар. Өйткені, сапар барысында Астана­ның, БҰҰ Қауіпсіздік Кеңесінің жауап­кер­шілікті мүшесі ретінде, осы аса маңызды саяси органның қызметіне бейбітшілікті сақтау мен жаһандық ауқымда тұрақтылықты қамтамасыз ету істері бойынша сапалы үлес қосуға да­йын екені атап көрсетіліп, бұл жайт жан-жақты қолдау тапты. Бұл қатарда, сондай-ақ, БҰҰ Хатшы­лы­ғының жаңа басшылығымен, мүше елдер сыртқы саясат ведомстволары және делегацияларымен, оның ішінде Қауіп­сіздік Кеңесіне енетін елдер де бар, байла­ныстарды нығайту сияқты маңызды мәселелер де назардан тыс қалған жоқ.