Мәскеудегілер дауыс беруге дайындалуда

Қазақстан Республикасының кезектен тыс президенттік сайлауына байланысты республикамыздың шет­елдік мекемелері жанынан құ­рылған сайлау учаскелерінің бірі Қазақстанның Ресейдегі Елші­лі­гі­нің резиденциясында орналасқан. Мәскеудегі бұл №143 сайлау учаскесінде дипломаттар, еліміздің ТМД, ЕурАзЭҚ, ҰҚШҰ, Кеден одағы ко­миссиясы жүйесіндегі өкілдері, қа­зақстандық ұйымдар мен компа­ния­лардың Мәскеудегі өкілдіктерінің қызметкерлері, олардың отбасы мүшелері, жоғары оқу орындарында білім алып жүрген студенттер мен әскери курсанттар, өзге де қазақ­стан­дық азаматтар дауыс береді. Дауыс беруге арналған үй-жай талапқа сай жабдықталған. Бір тақтаға президенттікке кандидат­тардың фотосуреті мен олар туралы ақпарат ілінген. Орталық сайлау комиссиясы белгілеген құжаттар жиынтығы, учаскелік сайлау комис­сиясының құрамы арнаулы тақтаға орналасқан. Сайлау комиссиясының дербес бөлмесі бар, онда комиссия мүшелерінің күн сайынғы кезекшілігі ұйымдастырылған. Дауыс беру уақыты мен орны ресейлік БАҚ-тар арқылы сайлаушылар назарына жеткізілді. Шетелдік мекемелердің жанында құрылған сайлау учаскелері бой­ынша белгіленген талапқа сәйкес сайлаушылар тізімін таныстыруға беру үшін комиссия мүшелері сай­лау­шылар тізімін нақтылап, пысық­тау үстінде. Сайлаушылар арасынан биыл тұңғыш рет дауыс беретін жастар анықталуда. Сайлау комиссиясы осы жас сайлаушы­лар­дың алғаш рет пайдаланғалы тұрған мемлекет бас­шысын сайлау құқығын есте қал­дыруына қатысты іс-шара­ларды да ойластыруда. Биылғы президенттік сайлау – халықтың өз таңдауы. Мұны Қа­зақстаннан тыс жерде тұрып жат­қан ел азаматтары да терең сезінуде. Соған орай 3 сәуір күні әркім өз жүрек қалауымен таңдаған кан­дидатын жақтап дауыс беруге дай­ындалуда. Серікқали БАЙМЕНШЕ, «Егемен Қазақстан» – Мәскеуден. Ресей Федерациясы.