Жастық жалын ел игілігіне қызмет етсін

Кез келген қоғам­ның ілгері дамуы оның әрбір азаматының Отан­­­­ға деген сүйіс­пен­ші­лігі мен болашаққа деген талпыны­сынсыз мүм­кін емес. Әр азаматтың ықы­лас-ниеті мен арман-тілегінен бастау алып, ұлт мұратын жүзеге асыру масатында құрылған «Нұр Отан» ХДП бүгінде жал­пыхалықтық саяси күшке айналды. Біздің таңдаған саяси бағытымыздың дұрыстығын өткен жылдар ішінде қол жеткізген табыстармен дәлелдеуге болады. Өткен барыс жылы ел тарихында маңызды орын алатын оқиға – Қазақстан Еуропаның аса беделді ұйымы – ЕҚЫҰ-ға табысты төрағалық етті. Сонымен қатар, 11 жыл бойы өтпеген Ұйым Саммитін ұйымдас­ты­рып, Астана Декларациясын қабылдатты. Бұл жоғары сенімнің түп негізінде елімізде жүргізіліп отырған салиқалы саясат­тың нәтижесінде қалыптасқан этносаралық татулық, саяси тұрақтылық, дінаралық және конфессияаралық келісім жатыр. Еліміздің экономикалық тұрақты да­муы­ның және тиімді сыртқы саясатының нә­тижесінде Қазақстан 2011 жылы ШЫҰ мен Ислам Конференциясы Ұйымына төр­ағалық етеді. Мұның өңірдегі геосаяси тұ­рақтылық пен халықаралық қауіпсіздікті қамтамасыз етумен қатар, Қазақстанның ин­вестициялық әлеуетін арттыратыны сөзсіз. Тәуелсіздік алған 20 жылдың ішінде бәсекеге қабілетті, саяси жүйесі мығым, экономикасы тұрақты мемлекет құруға қол жеткіздік. Бұл табыстарға жетуіміздің ал­ғышарттары жарқын болашаққа талпынған ортақ мүддеміз бен халқымыздың жа­расқан бірлігі болса, оны қалыптастыруда «Нұр Отан» саяси партия ретінде өз мис­сиясын жоғары абыроймен атқаруда. Әр азаматтың салиқалы өмірі, тұрғын­дардың әлеуметтік қорғалуы мен қоғамда демократияның өміршең болуы «Нұр Отан» ХДП алдына қойған негізгі страте­гиялық міндеттердің бірі. Үстіміздегі жыл­дың 11 ақпанында өткен «Нұр Отан» ХДП XIII съездінде қабылданған 2020 жылға дейінгі даму бағдарламасы осы міндеттер биігінен көрінудің кепілі. Сондай ақ, партия басымдықтарының бірі ел болашағы – жастар әлеуетінің са­пасын арттыру. Партия съезінде жастар тәр­биесіне жаңа леп беру қажеттігі, Отан игілігі үшін жұмыстану керектігі атап көрсетіліп, жастарды қоғамға қызмет етуге баулу мақсатында олардың басын біріктіретін «Жас Ұлан» қозғалысын және «Жас Қыран» балалар ұйымының жаңа жүйесін құруға нақты тапсырма берілді. Осыған орай, «Нұр Отан» ХДП-ның «Жас Отан» жастар қанаты мектеп жа­сынан бастап рухани-адамгершілік тәрбие­леу үрдісінің бірегей құрылымын жасау үшін «Жас Ұлан» және «Жас Қыран» ұй­ым­дарының жаңа жүйесін құруға білек сыбана кірісіп кетті. Ағымдағы жылдың 10 наурызында Парламент Мәжілісі депутаттарының, орталық мемлекеттік органдар өкілдерінің және балалар ұйымдары жетекшілерінің қатысуы­мен аталған ұйымдардың құры­лымы  жө­нінде нақты іс-әрекеттер мен оны жүзеге асырудың тетіктері талқыланды. Жалпы, «Жас Ұлан» және «Жас Қы­ран» саяси сипаттағы әрекеттерге қатынас­пай­тын, жасөспірімдердің азаматтық белсенділігін арттыру арқылы оларды біріктіру бағытындағы қоғамдық іс-шараларды ұй­ым­дастырумен айналысатын ұйым бо­лып қалыптаспақ. Жиналыс қорытындысы бойынша ұй­ымдар жұмысын үйлестірудің нақты тетіктерін құру мақсатында орталық мемлекеттік органдар мен балалар ұйымдары же­текшілерінің қатысуымен сараптамалық топ құрылды. Жас ұрпақтың азаматтық қалыптасуы бағытында ұйымдар келесі міндеттерді жүзеге асыратын болады: – азаматтық белсенділік мәселесінде ұрпақтар сабақтастығын қамтамасыз ету; – жастардың жан-жақты дамуына жағдай жасау, олардың рухани-адамгершілік, зияткерлік және нақты әлеуетін, эко­ло­гия­лық және рухани мәдениетін арттыру; – жастардың бойында қазақстандық патриотизм сезімін және азаматтық жауапкершілік ұстанымын, республиканың мемлекеттік рәміздеріне, Қазақстан хал­қының мәдени мұрасына, тіліне және дәстүрлеріне құрметпен қарауды қалып­тастыру; – саламатты өмір салтын насихаттау; – жастардың әлеуметтік маңызды бас­тамаларына қолдау көрсету және оларды іске асыру; – жастар арасында спортты, туризмді дамыту арқылы рухани және табиғи жетілуін қамтамасыз ету; – жастарды аға буынға деген құрмет, қамқорлық және мейірімділік рухында тәрбиелеу; – дарынды жастарды іздеу, оларға көмек көрсету және ілгерілету; – ғылым мен білімнің әртүрлі сала­ларындағы, мәдениет пен өнер, қоршаған ортаны қорғау салаларындағы жастардың ғылыми-зерттеу, ақпараттық жұмыстарын ұйымдастыру және оларды қолдау. Бүгінгі күні аталған ұйымдар жұмы­сының бағыт-бағдары республи­камыздың өңірлерінде «Жас Отан» жастар қанаты филиалдарының ұйытқы болуымен қызу талқылануда. Талқылау қорытындысы бо­йынша ұсыныстар түгелдей ескерілетін болады. Бекетай ҚАДІРҚҰЛОВ, «Жас Отан» ЖҚ Атқарушы хатшылығының менеджері.