Жүз жолдық жаңалықтар

Теннис. Осы күндері теннистен Қы­тай­да өтіп жатқан ITF Kumming ха­лық­аралық турнирінде қазақстандық Зарина Диас финалға жолдама алды. Жар­тылай фи­налда ол индонезиялық Ая-Фани Дамаянтиді үш сетте – 3:6, 6:0, 6:3 есебімен жеңді. Қазір Зарина WTA рейтингінде 153 орынды иеленіп отыр. Егер осы турнирде жеңіске жетсе Зарина 25 000 АҚШ дол­ларына ие болады. Ал АҚШ-тың Майами қаласында ерлер және әйелдер арасында өтіп жатқан тағы бір турнирде Михаил Кукушкин мен Ярослава Шведова жекелей сында келесі айналымға шықты. Алғашқы айналымда Кукушкин фин Яркко Ниеминенаны жеңсе, Шведова италиялық Сара Эрраниден басым түсті. Осы турнирге қатысқан Андрей Голубев алғашқы айналымда хорват Иван Додигуден жеңіліп қалды. Өкінішке қарай, Голубевтің жолын тағы «Челленджер» сериясы бойынша Марокконың Маракеше қаласында өтіп жатқан Morocco Tennis Tour турниріне қатысқан Евгений Королев пен Юрий Щукин қайталады. Олар екінші айналымда қарсылас­тарына есе жіберді. Коньки. Астанадағы «Алау» спорт сарайында классикалық және спринттік коньки тебуден ел чемпионаты аяқталды. Жарыста классикалық көпсайыстағы төрт қашықтықтың қорытындысы бойынша әйелдер арасында бірінші орынды Ольга Жигина (Астана), екінші және үшінші орынды Елена Урванцева (Петропавл) мен Марина Иванова (Қар­а­ған­ды) иеленді. Ал ерлер арасында бас жүлдені Артем Белоусов (Астана), екінші орынды Максим Баклашкин (Астана), үшінші орынды Федор Мезенцев (Алматы) жеңіп алды. Осы сында Петропавл қаласының тумасы, ұлттық құраманың мүшесі Роман Креч 500 метрлік қашықтықты 35,50 секөнтте жүгіріп, Қазақстан рекордын жаңартты. Ол бұған дейін былтыр Ванкувер Олимпиадасының алдында Калгари қаласында өткен ISU Time Trials турнирінде рекорд жасап, күміс жүлдеге ие болған еді. Бірақ ол кездегі рекорд биік таулы мұз айдынында жасалса, бұл жолы ол жа­сан­ды мұз айдынында жүзеге асырылып отыр. Дзюдо. Келесі жылы елімізде дзюдодан «Үлкен дулыға» аясындағы ірі ха­лық­ара­лық турнирдің бірі өтетін бола­ды. Мұн­дай шешім Халықаралық дзюдо феде­ра­ция­­сы­­ның кеңейтілген мәжілі­сін­де қабыл­данды. «Үлкен дулыға» аясындағы алғашқы турнир 2009 жылы Оңтүстік Кореяның Сувон қаласында өткен болатын. Одан кейін турнир Әзірбайжанның Баку қаласында ұйымдас­тырылған. Енді үшінші турнир келесі жыл­дың қаңтар айында Алматыда өтпекші. Осы турнирде жеңімпаз атанған спорт­шыға Олимпиада жолдамасымен бірге, 200 000 АҚШ доллары табыс етіледі. «Егемен-ақпарат».