Парызыңды ұмытпа

Соңғы кездері Қазақстан үшін даурықпа әңгімеден басқа ештеңе жасап көрмеген біреу­лер­дің сайлауға бойкот жария­лау­ға шақыру жөніндегі алып­қаш­па әңгімелері естіле баста­ды. Бұл – есті кісінің, осы елге бол­сын дейтін, мемлекетіміз өссін, өр­кен­десін дейтін азамат­тардың айтар әңгімесі емес, ел ішін алатайдай бүл­ді­ре­тін аттөбеліндей топтың айқайы болса керек. Қазақстан халқы сайлауда дауыс беру мүмкіндігін пай­да­лануы керек. Тәуелсіздік алғанымызға енді жиырма жыл толып отыр. Бажайлап қарасақ, кеше кім едік, бүгін кімбіз? Көрші жұрт­тар Қа­зақстанның өткен ға­сыр­дың ая­ғын­да тап болған қиын­шылық­та­рынан әлі күнге дейін бат­пақтап шыға алмай жатыр. Жы­лан жалағандай дүкендер, қа­ңы­рап қалған ауылдар мен қа­ла­лар, болашаққа сенімсіздеу қа­ра­ған күндер, нәумез ұрпақ тағ­дырын қалай естен шығаруға болады. Жиырма жылда кейбір мем­лекеттердің жүз жылда алатын асуларын алдық, белестерден өттік. Мемлекетіміз дүниежү­зі­лік мойындауға ие болды. Көп елдер біздің елге қарап бой түзей бастады. Жыл басындағы Қысқы Азиадаға қатысқан қырғыз спортшыларының: “Қазақ болу қандай бақыт”, дегенін “Егемен Қазақстаннан” оқып мерейленіп қалдық. Ел аман, жер аман, жұрт тыныш. Халқының жағдайы бүгінгіден де жарқын болсын десең, сайлауға бар. Ол – сенің азаматтық парызың. Көлденең көк аттының қыздырма сөзіне ермей, таңдауыңды жасайтын құқығыңды пайдалан. Өйт­кені, Қазақстан бәріміздің біртұтас шаңырағымыз. Әбдірахман ОМБАЕВ, Мемлекеттік сыйлықтың лауреаты, ауыл шаруашылығы ғылымдарының докторы. Шымкент.