Қарапайым жанның мұң-мұқтажы ескерілсе дейді

Астанада Коммунистік халықтық партиясы атынан президенттікке кандидат Ж. Ахметбеков ТДМ өңірінен келген байқаушылар миссиясының өкілдерімен кездесу өткізді. Күн өткен сайын аталған партия өкілінің сайлауалды кестесі тығыздала бастапты. Оңтүстік өңірге жасаған сапарынан кейін кандидат ТМД тарапынан келген байқаушылар миссиясы же­тек­шісінің орынбасары Олег Кулебамен кездесті. Қазақстанның Коммунистік халықтық партиясы сайлауалды штабында өткен кездесуде О. Кулеба Достастық елдері байқау­шы­ларының атқарған жұмыс­та­ры­на тоқталып, олардың бары­сын егжей-тегжейлі мәлім етті. Қазіргі таңда Қазақстанда Мол­довадан өзге ТДМ мемле­кет­терінің 425 өкілі тіркеуден өтіпті. Миссияның ауқымды тә­жі­рибесі айқындалған: олардың байқаушылары түрлі елдердің 57 сайлау үдерісіне қатысыпты. Байқаушылар миссиясы же­текшісінің орынбасары Коммунистік халықтық партиясы өкі­лі­нен сайлауалды үдерісінің жай-күйі мен сайлау заңнама­ла­рының сақталуы жөнінде өз пікірімен бөлісуді сұрады. «Біздің мақсатымыз – алдағы сайлау туралы көп ақпарат жинау. Бұл сайлау нәтижелерінің дұрыс қо­рытындылануы мен ол ақ­парат­тардың шындыққа сәйкес болуы үшін қажет»,– деді О. Кулеба. Ал Ж.Ахметбековтің пікірінше, коммунистердің үгіт-наси­хат материалдары мен олардың билбордтарының орналасуына қа­тысты азды-көпті кемшіліктер сайлауалды жұ­мыстардың ал­ғаш­қы кезе­ңін­де орын алыпты. Ал бүгінде ондай заң бұзу­шы­лықтардың ке­дір-бұдыры тегістелген көрі­не­ді. Сондай-ақ, Ж. Ах­метбеков өзінің сайлауалды қызметтері жөнінде ақпарат та­ратып жат­қан БАҚ жұмы­сына көңілі тола­тындығын жеткізді. Басқосу кезінде кандидат өзінің Қа­зақ­станның оңтүстік өңір­леріне жасаған сапарлары жө­нін­де қысқаша ақпар беріп өтті. Оның айтуынша, сайлауалды науқан үдерісіне берілген уа­қыт­тың тапшылығына сәйкес, ол кейбір өңірлерге сенім білдірілген адамдарын жібергенін, олардың өз атынан сайлаушылармен кездесіп жүргенін айтты. Бір атап өтерлігі, коммунистер сайлау­шы-электоратпен кездесу бары­сын­да негізгі басымдық өз арба­сын өзі сүйрететін қарапайым жандарға берілгендігін атап өтті. Олар көп жағдайда ауылды жерлерде өз нәсібін өздері тауып жүрген азаматтар көрінеді. Ком­мунистердің есебі бойынша, мұндай азаматтардың саны 2 млн. 700 мың адамды құрайды. «Олардың басым көпшілігі көп жылдардан бері ешқандай сай­лауға қатыспай келіпті. Себебі, бұл азаматтарды бір сауал ғана мазалайтын болған – ол «Отбасымды қалай асырап, бақ­сам екен?» деген сауал. Сондық­тан, көшеде, сауда нүктелерінде осын­дай азаматтармен кездесу барысында оларды сайлауға келіп, өз кандидатына дауыс беруге шақырдық. Біз осы арқылы жұмысшы азаматтардың, қара­пайым халықтың дауыстары на­зарға іліксе дейміз», – деді өз сөзінде ол. Ләйла ЕДІЛҚЫЗЫ. Астана.