Көпшілік мүддесі – көкейкесті

Қазақстан Коммунистік халықтық партиясынан президенттікке кандидат Жамбыл Ахметбековтің сайлауалды кездесулері бұрнағы күні Қарағандыда жалғасты. Қарағандыдағы мәшине жасау зауыты – аймаққа ертеден аян өндіріс ошағы. Кезінде көмір өндіру техникасын құрастыру бойынша атағы алысқа танылған кәсіпорын бүгінде сол үрдісті жа­ңаша жаңғыртуға ұмтылып келеді. Бұл еліміздің біраз жерінде болған үміткердің өндірісті өңір жұртшылығын да қамтыған жүздесулерінің бірі еді. Қазір уа­қыты тығыз, қызған үгіт-на­сихат іс-шаралары қай-қайсына үл­геру­ге тырысушы Жамбыл Ахмет­бе­ков Астанадан келген бетте ат­басын аталған зауытқа тіреді. Бірден цехтарды аралап, жұмыс­шы­лармен емен-жарқын әң­гіме құ­ру­ға ден қойылды. Олар да оған ықы­лас танытып, сөз­ге еркін ара­ласты. Екі жақтан қойылған сұ­рақ­тар сұх­батты қыздырып әкетті. Халықшыл коммунистер жетекшісі жиналған қауымды сай­лау­алды бағдарламасымен, пар­тия­ның ұстанған саяси тұғыр­на­ма­сымен қысқаша таныстыра келіп, әңгімені өмірдегі өзекті мә­селелермен ұштастыра өрбітті. Соның ішінде сөз барысында өзінің үш бастамасы туралы ой­ларын ортаға салды. Оның негізгі жолдары бойынша күнкөрістің ең төменгі көрсеткішін халық­ара­лық стандарттарға сәйкес­тен­діру, жас мамандардың жұ­мыс­қа орналаса алуларын кепілдендіру, сондай-ақ коммуналдық төлемдер жүйесін үйлестіру ұс­та­нып отырғанын алға тартты. Мә­селен, коммуналдық төлем­дер­ге тоқталғанында үміткер оның еңбекақысы төмен азаматтар үшін табысының 10 пайы­зынан аспай белгіленуін атап өтті. Жалпы, баға мен тариф­тердің шектен тыс өсе беруі жөн­сіз екені, сондықтан биліктің ха­лықтың мұң-мұқтажын барын­ша қорғауы осы бағыттағы іс-қыз­меттің басты бағамына ай­на­луы керектігі атал­ды. Бағ­дар­ламада көзделгендей, қоғамның әлеуметтік жағынан аз қам­тыл­ған тобына қамқорлықты күшей­ту, соған ықпал ету пар­тияның бас­ты мақсаты сана­ла­тындығы айтылды. Жұмысшы­лар­мен әң­гі­меде көпшілікті тол­ғантқан бірқатар жайлар топ­та­лып, ең түйінділері халық атынан мемлекет тарапына жолданатын­ды­ғы мәлімделді. Жамбыл Ахметбековке жұ­мыс­шылар сауалдарды аз қой­мады. Біразы жоғарыда айтыл­ған жайларға айналып соға бергенімен, Қазақстан Коммунистік халықтық партиясының серкесі тақырыпты қайта толықтырып, олардың шешімін табу жолын­дағы өз ұстанымын, ой-пікірін тіл­ге тиек етті. Кездесуге қаты­сушылар назарды ұжым мүше­ле­рінің қатары жылдан жылға азайып әрі жас жағынан қар­тайып бара жатқандығына, кен техникаларын жасауға қажетті металмен қамтамасыз етілудің нашарлығына, тапсырыстардың аз­дығына аудартты. Парламент Мәжілісінің депутаттары ара­сында жұмысшы қауым өкілдері де болса деген тілектер білдірілді. Осы орайда Ж.Ахметбеков ха­лық­шыл коммунистердің 2012 жыл­ғы парламенттік сайлауға бел­сенді түрде қатысатындық­та­рын, пікір ескерілетіндігін жеткізді. Бұдан соң ҚКХП-дан президенттікке кандидат облыс орта­лы­ғындағы Д.А.Қонаев атын­да­ғы заң колледжі оқытушылары және шәкірттерімен кездесу өт­кізді. Кандидатты қолдау қо­ғам­дық штабының жетекшісі, партия облыстық комитетінің бірінші хатшысы Валентин Прыдков оларға өз өкілдерін таныстырып, сөз берді. Жамбыл Ахметбеков бұл жолғы жүздесуде білім беру саласына байланысты мәсе­ле­лерді сөзге өзек етті. Жиынға қатысушылардың бірқатар сау­ал­­дарына жауап берді. Айқын НЕСІПБАЙ. Қарағанды.