Президент стипендиясы тапсырылды

Алматыда Мемлекеттік хатшы Гүлшара Әбдіқалықова Президенттің тапсырмасы бойынша белгілі мәдениет және өнер қайраткерлеріне Қазақстан Республикасының Тұңғыш Президенті Елбасының 2016 жылғы мәдениет саласындағы мемлекеттік стипендиясын табыс етті. Стипендиялар мемлекеттік қолдау көрсету мақсатында Қазақстан Республикасының құрметті атақтары мен наградаларын иеленген мәдениет және өнер қайраткерлеріне, сондай-ақ, айтулы шығармашылық жетістігі үшін дарынды шығармашыл жастарға Қазақстанның мәдениетін жасауға, сақтауға және дамытуға қосқан үлесі үшін беріледі. Биылғы стипендия иегерлерін құттықтай келе, Мемлекеттік хатшы Г.Әбдіқалықова  «Бұған дейін табысталып келе жатқан  мәдениет саласындағы стипендия мен Президент стипендия­сы біріктіріліп, бұдан былай Қазақстан Республикасының Тұңғыш Президенті – Елбасының мәдениет саласындағы мемле­кет­тік стипендиясы деп аталатын болды. Биылғы жылғы сти­пендияның ерекшелігі – әде­биет пен өнердің аға буын қай­раткерлерінің құрамы сол қалпында сақталып, олардың қатары жемісті еңбек етіп жүрген жастармен толықтырылып отыр. 2016 жылғы стипендияның толық құрамы  9 % – 25 пен 35 жас аралығындағы жастар, 12 % – 35 пен 60 жас аралығындағы орта буын, 79 % – 60-тан асқан    аға буын өкілдері болып табылады. Жалпы, тізімнің 12 па­йызын әртүрлі этнос өкілдері құрайды»,– деді. Мемлекеттік хатшы кездесу аясында зиялы қауыммен бірге әртүрлі мәдениет мәселелерін талқылап, руханият әлеміндегі ортақ істер туралы пікір алысты. Елбасы мен ел Үкіметі көр­сетіп отырған қолдауға алғысын білдірген жазушы Смағұл Елубай қаламгерлер қауымын көптен бері толғандырып келе жатқан қаламақы мәселесін қамтыған жаңа заң жобасының талқыланып жатуы әде­биетке және оның өкілдеріне танытқан жанашырлық екенін атап өтті. Жиырма бес жылдан бері күлбілтеленіп, шешімін таба алмай келе жатқан кино туралы заң жобасының да кеш те болса қолға алынып, Парламентке жол тартуы бұл саладағы көп түйткілді реттейтін жаңа қадам болмақ.  Жазушының ойынша, мәдениетке жасалған қамқорлық – халыққа жасалған қамқорлық. Ал, мұндай қамқорлық сөзсіз жемісін де, жеңісін де бермек. Қаламгер Мемлекеттік хатшыға «ұлттың рухын  көтерген «Алмас қылыш» фильмі сияқты алдағы уақытта қазақтың дәстүрлі дінін байтақ елге таратқан  ұлы тұлға Қожа Ахмет Ясауи туралы тағы бір фильм түсіріліп жатса, халықтың еңсесі көтеріліп қалар еді» деген ұсынысын айтты. Биыл бірінші рет Елбасының Мемлекеттік стипендиясын иеленіп отырған ақын Бауыржан Жақып атын атауға тыйым салған Алаш арыстарының ор­та­мызға қайта оралып, шығар­ма­ларының оқырманмен қауыш­қанына қуаныш білдіре келіп, қазақ әдебиетінің азат ойлы, еркін әдебиетке айнал­ғаны тәуелсіздіктің ең үлкен жаңа­лығы екенін айтты. Мемлекеттің шығар­машылық өкілдеріне қолдау білдіруі оларды жаңа шығарма­лар жазуға жетелеп, биік белес­терге талпындыратынын қа­дай айтқан ақын жүрек­жарды алғыс сөзін тәуелсіздік ту­ралы жырымен түйіндеді. Дос­тық үйіндегі жылы – шырайлы жүздесуде өнер мен әдебиеттің басқа да дара тұлғалары сөз алып, еңбегін бағалаған Елбасы мен мәдениеттің жанашырларына алғысын білдірді. Мемлекеттік хатшы Гүл­ша­ра Әбдіқалықова алдағы уақыт­та мәдениет және өнер қайрат­кер­лерімен, әдебиет өкілдерімен түрлі форматтағы кездесулер жоспарланып отырғанынан хабардар етіп, стипендия иегер­лерін сол кездесулерге атса­лысуға шақырды.  Бұл басқо­сулар еліміздің рухани-мәдени дамуының өзекті мәселе­лері мен мәдениет, әдебиет өкілдерінің келешек шығарма­шы­лық жоспарларын ортаға салып, пікір алысып, тиісті шешім­дер қабылдау үшін ұйымдас­тырылмақ. Кездесу соңында Г.Әбдіқалықова шығармашыл зиялы қауым өкілдері «Мәң­гілік ел» жалпыұлттық құнды­лы­қ­тарын ілгерілетуге, Қазақстан мәдениетін одан әрі дамытуға елеулі үлесін қосатындарына сенім білдірді. Айгүл АХАНБАЙҚЫЗЫ, «Егемен Қазақстан» АЛМАТЫ