Бұл атақты Қаз дауысты Қазыбек бидің шапаны. Шапан парша, мақта-матадан тігілген. Өн бойы құс қанаты, құмыра, өсімдік тектес өрнектермен, алтын, күміс жалатылған мыс жіптермен көмкерілген. Атадан қалған асыл мұра, зерлі шапанды Қазыбек бидің жетінші ұрпағы Қарқаралы ауданының Едірей ауылында тұратын Алтын Қожахметов ақсақал сақтап келіпті. Осы кісі 2008 жылы сол кездегі Президенттік мәдениет орталығының басшысы, көрнекті мемлекет және қоғам қайраткері Мырзатай Жолдасбековтің аттай қалауымен аталған орталыққа өткізген.
«Қазыбек бидің ұрпақтары атадан балаға мирас болған құнды жәдігерді үш ғасыр бойы көздің қарашығындай қастерлеп сақтаған. Әйтсе де әр жылдары адамдар қазақы жолмен ырымдап, шапанның әр жер-әр жерінен кесіп, қиып алып отырған. Құнды жәдігер бастапқы қалпында сақталмағандықтан, реставрация жұмыстарын жасауды қажет етті. Бидің шапанына көп кешікпей жаңарту, қайта қалпына келтіру жұмыстары жүргізілді. Шапанды шебер Тұрсынкүл Жайлаубаева 2008-2010 жылдар аралығында қайта жаңғыртудан өткізді», – дейді Ұлттық музейдегі Қазақстан тарихы бөлімінің ғылыми қызметкері Роза Кенжебекова.
Бұл шапанның Ұлттық музейдегі орны – Қазақстан тарихы залы. «Қазақ қоғамындағы құқықтық қатынастар» деген тақырыптағы заттардың қатарында тұр.
Айгүл СЕЙІЛОВА,
«Егемен Қазақстан»
Суреттерді түсірген
Орынбай БАЛМҰРАТ,
«Егемен Қазақстан»
