Үндеудің мән-маңызы талқыланды

Елордадағы Бейбітшілік және келісім музейінде «Қазақстан Республикасының Конституциясына өзгерістер мен толықтырулар енгізу туралы» заң жобасын талқылауға арналған дөңгелек үстел өтті. Шараға белгілі ғалымдар, мемлекет және қоғам қайраткерлері, музей қызметкерлері қатысты.   Бейбітшілік және келісім музейі директорының орынбасары Аманбек Мұқашев атап өткендей, Конституция мен тиісті заңдарға өзгерістер енгізу еліміз үшін аса маңызды да тағдырлы мәселе екені анық. – Мемлекеттік басқару жүйесін­де Парламент пен Үкіметтің пәрмені артуы өте маңызды. Тәуелсіздіктің ширек ғасырында біз нарықтық экономикаға көштік, оны орнықтыр­дық. Астана сынды еліміздің бас қала­сын салып, дүние жүзіне танылдық. Әлемнің алдыңғы қатар­лы елу елінің қата­рына қосыл­дық. Осы табыстардың не­гі­зін­де еліміз­де демократиялық құ­ры­­лым­дар­ды тереңдете дамытатын уа­­қыт жетті. Президенттің қолындағы би­лік­­тің бір бөлігін Парламент пен Үкі­­ме­т­ке беру туралы ұсыныс барша хал­ық­­ты толғандырады, – деді А.Мұқашев. Шарада айтылғандай, прези­денттік билік заман талаптарына лайықты жауап берді. Ішкі тәртіп­ті берік ұстау­ға, өтпелі кезеңде қо­ғамның дамуын жинақы түрде жүр­гізуге ық­пал етті. Ендігі уақытта Пре­зидент өкілет­ті­гі­нің бірқатар бөлігін басқа да билік тар­мақ­тарына жүктеу олардың жауапкер­шілі­гін арттыру үшін қажет болып отыр. Дөңгелек үстел барысына жиыл­ғандар Елбасы Үндеуінде айтылған маңызды міндеттер бойынша өзара пікір алмасып, ой қорытты, сондай-ақ, билік тармақтары арасында билікті қайта бөлу жөніндегі Елбасы бастамасын қолдайтындықтарын білдірді. Арнұр АСҚАР, «Егемен Қазақстан»