Нұрсай суға кенелді

Су келді! Осы бір сөзді талай адам қайталаған шығар. Және бұл сөздің мән-мағынасын сол адамдардың бәрі терең түсініп, жете ұғынған да шығар дейміз... Нұрсай ауылының орналасқан жері теп-тегіс дала. Ауылдың шетіне шығып, айдалаға қарасаңыз, көз тоқтататын түк жоқ: сонау алыста аспан көгімен ұштасып, дөңгеленіп жатқан мидай жазықтық. Және ол даланың шеті мен шегі жоқтай көрінеді. Қадалатын бір қарайған болмаған соң көз де талады. Ал осы айдаладағы кез келген тосын ноқат бірден көзге түседі. Ен далада өскен балалар мұндай ноқаттың ненің сұлбасы екенін сол алыстан бірден аңғарады. Өйткені, олар бұл далада не жүретінін, не өсетінін жақсы біледі. Бұл далада өзен, көл, тау, орман деген атымен жоқ. Сонау аудан орталығы Қазталовканың жанындағы Сарыөзен де кепкелі қашан. Тіпті, бұрын осы өзеннің суы арнасына сыймай шалқып ағып, небір көліктерді түбіне батырып алатынына қазір сену де қиын. Бала күнімізде біздер үшін бұл өзеннің түбі жоқтай көрінетін, оның тереңінде апандай көздер барлығы туралы, суға шомылушыларды тартып әкететін осы бұлақ иірімдері жөнінде талай шытырман әңгімелер еститін едік. Құс біткенді иірген балығы қандай еді... Иә мұндай өзендердің тартылуының сыры адамдардың салғырттық ісінің сал­дары дейміз ғой. Көршілес елдерден бас­тау алатын талай өзендердің бағы ашыл­май қалды. Солай бола тұрса да, бірақ ел азамат­тарының судың таршылығын көрме­гені жөн. Судың қадірін ауыл адам­дары түгіл жайлы пәтерлерде тұратын тұр­ғын­дар да жақсы біледі. Сондықтан қала­дағы, яки қырдағы болсын барлық халық­ты сумен қамтамасыз ету үшін Үкі­мет бұл істі қолына алды. Сөйтіп, ауыл адам­­дары үшін су жетті, яғни «Ақ бұлақ» бағ­дар­ла­ма­сының арқасында мөлдір су келді. Кәдім­гі ауыз су. Оны ауылдықтар қазір ба­қыт суы дейді. Расында солай. Су – тіршілік көзі. Бұл сапалы ауыз суға ел халқы, оның ішінде нұрсайлықтар Елбасының қам­қор­лығы арқасында қол жеткізді. «Қазақ­стан Республикасының 2020 жылға дейінгі стратегиялық даму жоспары тура­лы» Мемлекет басшысының 2010 жылғы 1 ақпандағы Жарлығын және 2011 жылғы «Болашақтың іргесін бірге қалаймыз!» атты Жолдауын жүзеге асыру мақсатында ел Үкіметі 2011-2020 жылдарға арналған «Ақ бұлақ» бағдарламасын бекіткен бола­тын. Содан бері ел Үкіметі Елбасының тап­сыр­масы бойынша сумен жабдықтау және су бұру жүйелерін дамыту жөніндегі «Ақ бұлақ» бағдарламасын жүзеге асыру­да. Бағдарлама 2020 жылға дейінгі кезең­ге ар­налған және ол респуб­лика­ның елді мекендерінің барлығын ауыз су­мен жаб­дықтауға бағыт­талған. Елбасы Н.Назарбаев «Нұр Отан» партиясының XIV съезінде: «2017 жылға қарай еліміздің барлық қала­лары­ның 90 пайызы сумен жаб­дықтау­дың ор­та­лық жүйесімен қамтылады, 30 мыңнан астам коммуналдық желі қайта жаңар­ты­лады», – деп атап көрсеткен болатын. Бүгінде бұл айтылғандардың бәрі жүзе­ге асып отыр. Сонау жер түбіндегі Нұр­сай ауылына сапалы ауыз су барады деген­ге ол елді мекендегі адамдар көп сене қой­май­тын. Қазір сенім күшейді. Әр үйге са­па­лы ауыз су келіп тұр. Осы­ның алдында Қазталов ауданы газбен жаб­дықталған еді. Барлық үйге көгілдір отын жетіп, жұрт от жағудың, күл шығарудың азабы­­нан құтыл­ды. Бәрінен бұрын енді үйді жылы­ту мен тамақ дайындаудың оң­тай­­лан­­ғаны адамдарға орасан жеңілдік пен ша­т­­­тық туғызды. Бұл жақтың ауа райы да қо­л­а­й­сыз­дау: қыста суық, жазда ыс­тық. Жол қат­ы­насы өз алдына мәсе­ле. Сон­дай­да бұ­рын қыста отын үшін көмір жет­кізу деген алын­­бас асу бола­тын. Және алыс­тан тасы­ла­тын көмірдің бағасы удай қым­бат еді. Енді, міне, ауылдықтардың еш уайы­мы жоқ. Көгіл­дір отын да, су да бар. Аудан әкі­мі үш қа­батты мектепті күрделі жөн­деу­­ден өт­кізіп, іші-сыртын айнадай етіп жөндеп берді. Енді көп ұзамай облыс орталығынан бас­талған тас жол аудан орталығына да жетіп, одан әрі Нұрсай ауылын басып өтпек. Сон­да Кеңес заманында бұл жаққа келмеген ас­фальт жол да төселіп, өркениеттің төріне есік ашылғандай болмақ. Осы өзгерістерді көрген біреу, ауыл мүлде өзгеріпті ғой деп тамсанып қоймапты. Соншама не болды деп сұраса, ол: Ауылдарыңда балмұздақ та саты­латын болыпты ғой», депті. Сол айт­қан­дай, қазір ауылда су да бар. Енді ауыл­дың ал­тын­дай саф таза ауасы мен аура­сы, жанға шипа еті мен қымызы, жаңа өрке­ниетті тұр­мысы ешкімді де бейжай қалдыра қоймас. Александр ТАСБОЛАТОВ, «Егемен Қазақстан» Батыс Қазақстан облысы