Кеше елорда әкімі Әсет Исекешев тұрғындар алдында есеп берді. Жиынға барлық басқармалар мен ведомстволар басшылары, мәслихат депутаттары, қоғамдық кеңес өкілдері, коммуналдық қызметтер жетекшілері қатысты. Қала басшысы алдымен өткен жылғы негізгі экономикалық көрсеткіштерге тоқталып, Елбасы Нұрсұлтан Назарбаевтың бастамасымен қолға алынған «Нұрлы жол» инфрақұрылымды дамыту бағдарламасын іске асыру барысы, шағын және орта бизнесті қолдау, технологиялық индустрияландыру шаралары туралы айтып берді.
Жұмыссыздық деңгейі ең төменгі көрсеткіште
«Президент биыл да халыққа Жолдауын жария етіп, тәуелсіз мемлекетіміздің үшінші жаңғыртуға аяқ басқанын мәлімдеді. Маңызды құжат бізге жаңа бағыт беріп, жоспарымызды айқындады. Әрине, олардың барлығы Астананың бүгінгі дамуымен түгелдей астасады», деген Ә.Исекешев бас шаһар Еуразия кеңістігіндегі маңызды орталыққа айналуы тиістігін айтты. Әкімдік аса өзекті өтініштерді құрылымдап, мәселелерді шешу үшін алдағы үш жылға нақты шаралар кешенін әзірлеген. «Біз қаланың әр ауданына егжей-тегжей талдау жүргіздік. «109», «Әкімдіктің бірыңғай электронды өтініштер жүйесін» талдадық. Әлеуметтік нысандарды аралауда, аудан әкімдерінің халықпен есептік кездесулерінде, ашық есік күндері және «Нұр Отан» партиясы филиалы шараларында маған 50 мыңнан аса сұрақ, өтініш түсті», деді қала әкімі. Ә.Исекешев қала халқын жұмыспен қамту және әлеуметтік қорғау мәселелеріне тоқталды. Бүгінде әкімдік атаулы төлемдердің отыздан аса түрін жүзеге асырады. Олар: қоғамдық көлікте жеңілдікпен жүру, тұрғын үй көмегі, мүгедектерді әлеуметтік қолдау. Қалада 19 мыңға жуық жаңа жұмыс орны құрылды. Жұмыссыздық деңгейі 4,6 пайызға төмендеген. «526 автобус мүгедектерді мінгізіп, түсіруге арнайы жарақталған, 956 аялдама бекеті едені төмен қоғамдық көлік үшін бейімделген», деді қала басшысы.Балабақшамен қамту – басты назарда
Әкімнің айтуынша, былтыр 79 мектепке дейінгі білім беру мекемесі пайдалануға тапсырылған. Оның 3-уі – мемлекеттік балабақша, 44-і – жекеменшік, 32-сі – шағын орталық. 46 мыңнан аса бала балабақшамен қамтылған. 1 қаңтардағы жағдай бойынша, мектепке дейінгі білім беру мекемелеріне кезекте тұрғандар саны – 33 240 бала. «Биыл әкімдік мемлекет-жекеменшік әріптестігі шеңберінде 720 орындық 3 балабақшаны, 480 орындық 2 мемлекеттік балабақшаны пайдалануға тапсырады», деген Ә.Исекешев қаңтар айынан бастап мектепке дейінгі білім беру мекемелеріне жолдамаларды автоматты түрде беру жүйесін енгізу жұмыстары жүріп жатқанын, жекеменшік балабақшаларға жолдамалар беру қанатқақты режімде іске қосылғанын айтты. Әкім «Бірыңғай медициналық ақпараттық Call-орталық» жобасы іске қосылғанын хабарлады. «Биыл бұл қызмет тәулік бойғы жұмыс кестесіне көшті. Енді азаматтар «103» бірыңғай нөмірі арқылы денсаулық сақтау бойынша барлық сұрақтарына жауап алып, дәрігерге жазыла алады», деді қала басшысы. Ол пациенттің бірыңғай электронды медициналық картасын енгізу жобасы қанатқақты режімде пысықталғанын да жеткізді. Бұл халыққа көрсетілетін медициналық қызметтің сапасын арттыруға және көптеген емханаларда қағаз құжат айналымын алып тастауға мүмкіндік берді. Ә.Исекешев халықты баспанамен қамтудың өткір мәселелерін түсіндірді. 1 қаңтардағы жағдай бойынша үй алу кезегінде 44 мың адам тұр. Оның 6 мыңнан астамы өткен жылы тіркелген. «Былтыр тұрғын үй бағдарламалары шеңберінде 603 пәтер берілген. «Нұрлы жер» бағдарламасы аясында 2021 жылға дейін 40 мың пәтер тапсырылмақ.«Әкім ел ішін аралауы керек»
Есептің екінші бөлігінде екі мыңға тарта тұрғын әкімге алаңдатқан мәселелері бойынша сұрақтарын қойды. Осы сәтте алғаш рет әкімдіктің Фейсбук әлеуметтік желісіндегі ресми парақшасында тікелей онлайн-трансляция жүрді. Л.Н.Гумилев атындағы Еуразия ұлттық және С.Сейфуллин атындағы Қазақ агротехникалық университеттері базаларында орнатылған онлайн-байланыс арқылы жүзден аса адам Ә.Исекешевке сауалдарын жолдады. Сонымен қатар, концерт залдың холлында халықпен кері байланыстың тиімділігін арттыруға бағытталған «Белсенді азамат» акциясы өтті. Бұған қоса, тұрғындардан жазбаша өтініштер қабылданды. Халық негізінен ПИК жұмысы, баспанамен қамту, денсаулық сақтау, білім беру, көлік және инфрақұрылым бойынша сұрақтар қойды. Олар көтерген мәселелер жауапты құрылымдық мекемелердің ерекше бақылауына алынды, түсініктемелер беріліп, шешу жолдары қаралды. Мәселен, елорда тұрғындарының бірі перзентханадағы орын тапшылығын сөз етсе, 75 жастағы астаналық ақсақал Ә.Исекешевке қала ішін аралап жүруді дағдыға айналдыруды сұрады. Жарыссөзде астаналық әйел дәрі-дәрмектің қымбаттығын айтып шағымданды. «Оны мүмкіндігі шектеулі жандардың сатып алуына жағдайлары жете бермейді», деген оған бұл мәселе қалалық мәслихатта қаралып жатқанын жеткізді. Жиын барысында әкімнің жұмысына оң баға бергендер өз тілектерін де білдіріп жатты. Асхат РАЙҚҰЛ, «Егемен Қазақстан» Суретті түсірген Ерлан Омаров, «Егемен Қазақстан»
