«Барселона» тізерлеп, «Арсенал» тас-талқан болған күн

Футбол жанкүйерлері түн ұйқысын төрт бөліп көретін УЕФА чемпиондар лигасы деген турнир бар. Екі айлық үзілістен кейін бұл дода осы аптада қайта жалғасты. Чемпиондар лигасының 2016/17 жылғы маусы­мының топтық кезеңі өткен жылдың желтоқсан айында аяқталған еді. Осы аптада плей-офф бәсекелері басталды. Топтан суырылып шыққан 16 мықты өзара ширек финалдың жолдамасын сарапқа салады. • Кесте бойынша бұл аптаға 4 ойын жоспарланған. Сейсенбі күні Франция мен Испания чемпиондары кездесті. Златан Ибрагимович кеткен соң, Париж командасы ПСЖ әлсіреп қалғандай көрінген еді. Алайда, швед сұрмергенінің орнын жоқтатпайтын футболшылар аз емес екен. «Парк де Пренс» стадионында алаң иелері «Барселонаны» қабылдап, 4:0 есебі­мен жеңіске жетті. Есепті бірінші таймның ортасында айып соққысын дәл орындаған Анхель Ди Мария ашты. Үзіліске дейін Марко Верраттиден пас алған неміс футболшысы Юлиан Дракслер есепті еселей түсті. Осы күні өзінің 29-шы туған күнін тойлаған Ди Мария екінші таймда дубльдің авторы атанды. Матчтағы соңғы голды шабуылшы Эдинсон Кавани өз атына жазды. Топтық кезеңде 10 доп соққан аргенти­налық супержұлдыз Лионель Мессиді 21 жастағы француз қорғаушысы Преснель Ким­пембе «тұсап» тастады. Сондай-ақ, сұрмер­ген Суарес пен дриблингтің шебері Неймар да алаңнан бастары салбыраған күйде кетті. Қарымта ойын 8 наурызда «Камп Ноу» стадионында өтеді. • Португалия астанасы Лиссабондағы «Бенфика» мен «Боруссия Д» арасындағы ойын да алаң иелерінің пайдасына шешілді. Матчтағы жалғыз голды грекия­лық шабуылшы Костас Митроглу соқты. Немістердің таразы басын теңестіретін мүмкіндігі болған. Бірақ, Пьер-Эмерик Обамеянг 11-метрлік пенальтиден мүлт кетті. Осы ойында ерекше көзге түскен «Бенфи­ка» қақпашысы Эдерсонға қандай мақтау айтса да жара­сады. • Сәрсенбі күні Мадридтің «Реалы» өз алаңында Италиядан келген «Наполиді» қабылдады. Чемпиондар лигасының қазіргі жеңімпазы бірінші болып гол жіберіп алғанымен, есін тез жиып үлгерді. Алдымен 19-минутта Бензема таразы басын теңестірсе, үзіліс­тен кейін Кросс пен Каземиро мергендік танытты. Сөйтіп, «Реал» бірінші кездесуді екі доп айыр­машылығымен аяқтады. Бұл матч­та Каземиро, Роналду, Бензема, Кросс белсенді ойнады. • ПСЖ секілді «Бавария» да ширек финалға бір табан жақындай түсті. Биылғы жылы тағы да «Арсе­налмен» жолы түйіскен «неміс машинасы» қарсы­ласын аяған жоқ. Бұған дейін Арсен Венгер шәкірттері 1/8 финалда алты мәрте «ұшып» кеткен. Оның ішінде 2012/13 және 2013/14 жылдардағы маусымда дәл осы «Баварияға» есе жіберіп қойған болатын. Ойынға қысқаша тоқталатын болсақ, бірінші тайм тең аяқталды. Роббеннің голына Санчес үзіліске дейін жауап қайтарды. Бірақ, екінші таймда Германия чемпио­нын тоқтату мүмкін болмады. Тиаго Алькантара дубль жасаса, Левандовски мен Мюллер бір-бір голдан соқты. Енді келесі аптада тағы 4 ойын өтеді: «Манчестер Сити» (Англия) – «Монако» (Франция); «Порту» (Португалия) – «Ювентус» (Италия); «Байер» (Германия) – «Атлетико» (Испания); «Севилья» (Испания) – «Лестер» (Англия). Матчтар нәтижелері: ПСЖ – «Барселона» – 4:0 Голдар: Ди Мария, 18 (1:0). Дракслер, 40 (2:0). Ди Мария, 55 (3:0). Кавани, 72 (4:0). «Бенфика» – «Боруссия Д» – 1:0 Гол: Митроглу, 48 (1:0). «Реал» – «Наполи» – 3:1 Голдар: Инсинье, 8 (0:1). Бензема, 19 (1:1). Кроос, 49 (2:1). Каземиро, 54 (3:1). «Бавария» – «Арсенал» – 5:1 Голдар: Роббен, 11 (1:0). Санчес, 30 (1:1). Ле­вандовски, 53 (2:1). Алькантара, 56, (3:1). Алькантара, 63, (4:1). Мюллер, 88 (5:1). Диас ЕРКЕБҰЛАН, журналист АСТАНА