Сарапшылық ұйымдар сапалы қызметке баулиды

«Сараптама ұйым­да­рының палатасы» кәсіптік бірлестігі өткен жылдың ақпан айында елдегі үш бірдей сараптама ұйымының негізінде құрылған. Мемлекет басшысының «100 нақты қадам» Ұлт жоспарын жүзеге асыруды мақсат еткен бірлестік бүгінгі таңда құрылыс объектілерін жобалау саласындағы сараптама қызметін нығайту мен оны дамытуды, құрылысқа арналған жобалардың ведомстводан тыс кешенді сараптамасын жүргізуді және серіктес ұйымдардың кәсіби дамуын арттыра отырып, институционалдық базаны қалыптастыруды көздейді. Елбасы жариялаған Ұлт жоспарының 47-қадамында 2020 жылға дейін елде­гі сараптама қызметінің 90 пайызын ке­зең-кезеңмен жеке нарыққа беру жос­­­­пар­ланғаны белгілі. Осыған орай, жос­­­пардың орындалу барысын егжей-тег­­жейлі баян еткен елордадағы палата жиынында бірлестіктің бір жылдық жұмысы қорытындыланып, ертеңгі күн­нің еншісіне тиесілі шаруалар пысық­талды. Бүгінде алпысқа жуық сарапшылық кәсіпорынды қанатының астына алған «Сараптама ұйымдарының палатасы» кәсіптік бірлестігі елдегі жалпы на­рықтың 39 пайызын құрап отыр. Не­гізінен, жоспар бойынша бұл көр­сет­­­кіш жеке компаниялар арқылы 50 пай­ызға тең түсуі тиіс болатын. Рес­пуб­­ликаның әр өңірінен келген сарап­шы­лық ұйым өкілдерінің алдында баяндама жасаған басқарма төрағасы Бірлік Ережепов ұйымның алғашқы жылы жал­пы қызметті ұйымдастыру үдерісіне ар­налғанын айтып өтіп, бір жылдық жұ­мысты қорытындылады. «Бірқатар кәсіпорындар мемлекет меншігінен бәсекелестік нарыққа шық­қан­ымен, олардың көпшілігі сарапшылық қыз­меттің түп-төркінін жете түсініп, анық біле қоймады. Сондықтан да, бұл жерде бизнес пен орасан мол кіріс көзінің жоқтығын дұрыс түсіндіре отырып, сарапшылық ұйымның басты мақ­саты – жобаларды тексеру мен ғи­ма­­раттардың және құрылыс нысан­да­ры­ның қауіпсіздігін қамтамасыз ету екен­ді­гіне баса көңіл бөлуімізге тура келді», деді Б.Ережепов. Бүгінгі таңда палата қарамағындағы кәсіпорындардың нормативтік-құқықтық актілері жобаларын жасаумен қатар, мемлекеттік органдардың мүддесіне қызмет етеді. Сондай-ақ, мамандарды әдіс­­темелік оқытумен де айналысады. Со­ны­мен қатар, ұйымның кәсіби сарапшы­ла­ры сан түрлі жобаларды жоғары дең­гейде тексеруін үйлестіреді. Қызметке кі­ріскен алғашқы жылдың өзінде палата құ­рамына 60 ұйым тіркеліп, оның ішінде 9 мекеме тізімнен шығарылған болса, оның екеуі сарапшылық кеңестің сапасыз ше­шімін тұрақты түрде шығарып келгені анық­талған. Мамандар пікірінше, әсіресе, сара­п­шылық ұйымдарды нарықтық бә­секеге бе­рілуіне мемлекеттік орган­дар­дың нем­­құрайлы қарауы істің ілгерілеуіне ке­­рі әсерін тигізіп жатқан көрінеді. Со­н­дық­­тан да, осы күнге дейін жоспарға сай ұйымдардың 50 пайызы жеке компаниялар арқылы нарыққа жіберілудің орнына, қазіргі күнгі көрсеткіш жоғарыда атап өткеніміздей, 39 пайызды ғана құрап отыр. Нұрлыбек ДОСЫБАЙ, «Егемен Қазақстан»