Дүниежүзілік бокс сериясы: Қамшыбек Қоңқабаев та қарсыласын жеңді

Талдықорған қаласында өтіп жатқан Дүниежүзілік бокс сериясында (WSB) қазақстандық «Astana Arlans» пен өзбекстандық «Ozbek tigers» командалары қолғап түйістірді. Соңғы болып шаршы алаңға +91 кило салмақта қазақстандық Қамшыбек Қоңқабаев пен Баходир Жалолов шықты. Алғашқы раундта жерлесіміз айқын басымдыққа ие болды. Өзбек боксшысын қысымға алып, бірнеше жойқын соққысын дарыта білді. Екінші кезеңде де Қоңқабаев шабуылдаумен болды. Қарсыласынан бойы қысқа болғанмен, қуалап жүріп ұрып, соққыларын дарыта білді. Қамшыбек қанша жерден батылдық танытқанмен, үш төрешінің екеуі ғана жеңісті берді. Үшінші раундта да жерлесіміз барын салды. Өзбек боксшысын бұрышқа тақап алып, бірнеше соққысын дәл тигізді. Ал Жалолов бойының ұзындығын, денесінің ірілігін бұл жолы да жөнді пайдалана алмады. Келесі үш минут та дәл осы бағытта өрбіді. Қамшыбек қарсыласын қорғаныстан бас көтертпестен төмпештеумен болды. Қарсы соққыларынан дер кезінде сытылып шығып, ойға алған жоспарын толығымен жүзеге асыра білді. Соңғы раундта да отандасымыз орайы келген мүмкіндіктерін жібере қоймады. Жалолов ара-тұра қимылдағанмен, ешнәрсе шықпады. Бұл жолы да Қоңақабаевтың мерейі үстем болды. Осылайша, соңғы болып рингке шыққан боксшымыз жеңіске жетті. Жалпы есеп 4:1. «Астана Арландары» «Өзбек Жолбарыстарынан» басым түсті.