Қар құрсауынан алып шықты

Биыл Қостанай өңірінде қар қалың. Боранда үріп жауған қар көптеген жерде жолдарды бөгеп тастайды. Әсіресе, Қарасу ауданындағы Ушаков селосындағылар биыл қыста кең дүниеден бө­лініп, аралда қалғандай се­зініп отыр. Бас даңғыл мен ауыл­ды қосатын 25 шақырым жол­ды қар үріп тастай береді. Тау боп үйілген қардан техни­ка жүре алмайды, оны тазалау да мүмкін болмай тұр. Сон­дықтан, Төтенше жағдайлар де­пар­таменті қызметкерлері мен Солтүстік өңірлік аэро­мо­бильді жедел-құтқару от­ряды құтқарушылары биыл қыста Ушаковқа көз қиығын салып отырды. Әй­теуір телефон байланысы бар, тұр­­ғындар төтенше жағдай қа­­лыптасқанда хабарсыз бол­май­ды. Жақында ғана ақпан­дат­қан боран күндері осы ауылда босануға тиісті әйел мен демікпемен ауыра­тын ер кісіні жедел ауру­ханаға жеткізу керек бол­ды. Солтүстік өңірлік аэ­ро­­мобильді жедел-құтқару от­рядының қызметкерлері жол таңдамайтын ТРЭКОЛ авто­мобилі жүкті әйелді, науқасты және олардың туыс­­тарын алып, оппа қар­мен жү­ріп оты­рып, 25 ша­қы­рым жер­дегі да­ң­ғыл жолға шы­ғар­ды. Аяғы ауыр әйелді кү­тіп тұр­ған жеңіл машина оны Әулиекөл аудандық ау­ру­хана­сына жеткізді, ер кісі­ні Қостанайға алып кетті. Құтқа­ру­шылардың айтуынша, Ушаков ауылына жететін жол­­ды көмген қардың үстімен құт­­қару техникаларының өзі зор­ға жүреді. Қыс бойына қар­дың тұтқыны болған ауылдан құтқарушылар аяғы ауыр үш әйелді перзентханаға жет­кіз­ді. Нәзира ЖӘРІМБЕТОВА, «Егемен Қазақстан» Қостанай облысы, Қарасу ауданы