Көрмеге келушілер қайда тамақтанады?

Таяуда «Астана ЭКСПО-2017» ҰК» АҚ Коммер­цияландыру департаментінің директоры Дәулет Еркімбаев баспасөз мәслихатын өткізіп, көрме қалашығы аумағында ұйымдастырылған басқосуда ұлттық компания өкілі халықаралық шара барысында қонақтар мен еріктілерді тамақтандыру бойынша жүзеге асырылып жатқан шаруалар туралы хабарлаған еді. «Астанада ағымдағы жылы өтетін ЭКСПО-2017 көрмесі – энергияның баламалы түрлерін сынаумен ғана ауқымды емес, сонымен қатар, қазақстандық бизнес үшін де үлкен мүмкіндік. Көрме арқылы елдегі шағын және орта кәсіпкерлікті жандандыра түсу керектігін Елбасы Нұрсұлтан Назарбаев арнайы тап­сырған болатын. Ал оған әлемнің түкпір-түкпірінен келетін қонақтарға жоғары деңгейде қызмет көрсетіп, ыңғайлы жағдай жасау бізге үлкен жауапкершілік жүктейді», деді Дәулет Еркімбаев. Оның айтуынша, қазіргі уақытта көрме аумағындағы қоғам­дық тамақтандыру орындарының 75 па­­йызы дайын. Олардың иелерін анықтау мақсатында өткен жылдың соңында жарияланған байқау жалғасуда. Кәсіпкерлер конкурс талаптарына сай іріктеледі. «Қоғамдық тамақтандыру алаңын құру үшін 10 мың шаршы метр жер бөлінді. Онда әртүрлі баға­­дағы 40 тамақтандыру орны жай­ға­сады. Тек мейрамхана, бар, кофеханалар ғана емес, әр елдің, әр ұлттың асханаларына, кафелеріне арналған алаңқайлар да болады», деді директор. Брифинг барысында Дәулет Еркімбаев бүгінге дейін көрме қонақ­тарына қызмет ететін 4,5 мың­нан астам ерікті тіркелгенін жет­кізді. «Қазіргі таңда ЭКСПО-2017 шарасының еріктілері саны 4,5 мың­ды құрап отыр. Олар үш ауы­сым бойынша 8 сағаттан жұмыс істейді: күндізгі, кешкі және түнгі. Еріктілердің тамақтануын толық қамтамасыз ететін арнайы 3 асхана әзірленді. Бір асхана – 1,5 мың орындық. Тамақтану қатаң кесте бойынша жүзеге асырылады. Олардың ұйымдастырушылары көрмеге қарай белгілі болады», деді компания өкілі. Директор еріктілердің арасында жеңілдетілген түрде және өз қаржысына тамақтанатындар болатынын айтты. «Біз оларды әлеуметтік жағдайлары бойынша іріктедік. Белгілі бір топ үшін тамақтану арзан болмақ. Көрме аясында адам басына тамақтану орта есеппен 700-800 теңгені құрайды», деді ол. Асхат РАЙҚҰЛ, «Егемен Қазақстан»