Димаштың жыл соңына дейін альбомы жарық көреді

Қазақстандық әнші Димаш Құдайбергенге қолдау көрсетіп отырған BGTalent продюсерлік орталығының негізін қалаушы әрі бас директоры Ние Синьюань sohu.com-ға берген сұхбатында Димаш туралы пікір бөлісті, деп хабарлады ҚазАқпарат. Сұхбат барысында ол «I am a singer» байқауының бесінші кезеңінде Димашқа не үшін «Uptown Funk» әнін бергені туралы айтты. «Жанкүйерлердің көбісі Димаштың бесінші кезеңдегі әні оның алтыншы орынға сырғып кетуіне себеп болды, бұл ән Димашқа келмейді деп жатыр. Димаш жас әрі талантты әнші екенін бәрі мойындады. Меніңше, ол осы бәсекенің шеңберінде тек жеңіс үшін ән шырқап, өз мүмкіндігін шектеп қоймауы керек. «I am a singer» байқауы Қытайға ғана емес Шығыс Азияның көптеген елдерінде танымал. Димаш осы сахнадан өзінің музыкадағы мүмкіндігін одан ары қарай кеңейте беруі тиіс. Сондықтан өзіне ұнаған әнді таңдап, өнердегі жаңа бағыттарын да ашып көруге тырыстық», - деді Ние Синьюань . Оның айтуына қарағанда, продюсерлік орталық Димаш арқылы қытайлық көрермендер мен жастардың музыкаға және жұлдыздарға деген түсінігін өзгертуге тырысқан. Димаштың өзгеше стилі қытайлық жастарды тек бет-әлпетке көңіл бөлетін кореялық музыка мәдениетінен алыстатуға септігін тигізген. «Жыл соңына дейін Димаштың жеке ән альбомы жарық көреді. Одан кейін жекелеген аймақтарда жеке концерттер ұйымдастыруды жоспарлап отырмыз. Әрі қарайғы даму барысы Қазақстандағы оқуын аяқтап, ағылшын тілімен француз тілдері деңгейін жоғарылатқаннан кейін жасалады», – деді Ние Синьюань.