Мәртебесі биік Маңғыстау

Тәуелсіздік алып, аяқты апыл-тапыл басқан, оның үстіне, дағ­да­рыстың қытымыр уысына түс­кен 1995 жылдардың өзінде-ақ республикалық бюджетке «донор» бола алған Маңғыстау облысы арада өткен жылдарды тек дамуға арнады, алдына қойған жоспар-межелерді бағындыру бағытынан айныған жоқ. Бүгінде өндірісі өркендеу жо­лын таңдаған, түбектің төрінде халқының саны өсіп, сайын дала­сының ойы мен қырында төрт түлік малының басы көбейген, ақшаңқан үйлер көкке бой созып, түрлі нысандар жарыса қанат жайған өңірдің тыныс-тіршілігі қалыпты дамып келеді. Маңғыстау облысының әкі­мі Алик Айдарбаев облыстың 2016 жылдағы әлеуметтік-эконо­микалық даму қорытындылары және 2017 жылға арналған мін­деттері туралы есеп беру кезде­суінде өткен жылғы атқарылған жұмыстар мен алдағы мақсаттар туралы құлағдар етті. Алдымен тәуелсіздік алған ширек ғасыр ішінде еліміз қол жеткізген же­тіс­­тіктерге шолу жасаған әкім «өңір­лердің қуаттылығы – тұтас Қазақстанның қуаттылығы» екен­дігін назарға салып, әлеуметтік-экономикалық ахуалы, даму әлеуе­ті жағынан республикадағы ал­дыңғы қатарлы аймақтардың бі­рі саналатын Маңғыстау өңі­рінің жай-жапсарын, өлкедегі шешілген және шешімін тап­паған мәселелерді жұрт наза­рына ұсынды. Айтуынша, 2015 жыл­ды қорыту кездесуінде тұр­ғын­дар тарапынан түскен 200-ге тарта сұрақты талдай келе, об­­лыста әлеуметтік сала мен ин­женерлік инфрақұрылымды да­мыту, ауылдық елді мекендерді көркейту, жұмыссыздық сынды мәселелердің маңыздылығын анықтаған. Бір жыл ішінде бұл мәселелердің біразы шешімін тап­са, Бейнеу ауданындағы 400 орындық политехникалық кол­ледж ғимаратының құрылысы, Маңғыстау ауданы Ащыбұлақ шағын ауданына ауыз су құбырын тарту, Мұнайлы ауданында орта­лық аурухана құрылысын салу жұмыстары шешілмеген. Әкім ал­дағы уақытта бұл мәселелердің бюджет қаржысының мүмкін­дігіне қарай кезең-кезеңімен шеші­летін­дігін айтты. 25 жылда облыс тұрғында­рының саны екі есеге өсіп, 640 мың адамды құрап отыр. Ішкі өңірлік өнім 2 триллион теңгеден асты. Өңір дамуына 4 триллион теңгеден астам инвестиция тар­тылды. Оның тең жартысы соңғы төрт жылда салынды. Орта және шағын бизнестің ішкі өңірлік өнім көлеміндегі үлесі 32%-ға дейін өсті. Облысымыздағы тұрғын үй қоры 6 миллион шаршы метр­ге көбейді. Оның 3 миллионнан астамы соңғы 5 жыл ішінде қол­данысқа берілді. Ауылдық елді ме­кендердің қарқынды дамуына баса көңіл бөлінуде. Бүгінгі таңда әр ауылда газ, байланыс жүйесі, телевидение және интернет бар. Орталық ауыз сумен қамту көр­сеткіші ауылдарда 53%-ға дейін өсті. Халықты жұмыспен қамту бағытында атқарылған іс-шаралар нәтижесінде еңбек нарығының барлық көрсеткіштері бойынша оң динамикаға қол жеткізілді, деді аймақ басшысы. Жақсы нәтижеге қол жеткізуге «Жұмыспен қамтудың жол кар­тасы-2020» және «Жаңа серпін» өңірлік бағдарламаларының ықпа­лы зор болған. 25 жыл ішінде облысымызда 27 ден­сау­лық сақтау ұйымы, 229 бала­бақша мен 64 мектеп іске қосыл­са, апатты жағ­­дайдағы мек­теп­тер мәселесі толы­ғымен шешіл­ген, сондай-ақ, ақысыз кәсіп­тік-техникалық білім беруді қам­тамасыз ету базасы құ­рыл­ды. «25 жылда облысымыз әлеуметтік-экономикалық даму­дың жоғары сатысына көтерілді», деп облыстың 25 жылдағы қол жеткізген жетістіктерін, даму сатыларын баяндаған А.Айдарбаев 2016 жылы жұмыстың өңір да­муының тұрақтылығын қамта­масыз етуге, Елбасы мен Үкімет берген тапсырмаларды орындауға бағытталғандығын жеткізді. Был­тыр сыртқы экономикалық фак­торлар өңір экономикасының бір­қалыпты дамуына өз әсерін ти­гізген. Мұнай секторындағы ахуалға байланысты өнеркәсіп өн­­дірісі 3%-ға төмендесе, ин­вес­тиция көлемі де 15%-ға азай­ды. Бі­рақ, өңір дамуының басқа көр­сет­кіштері бойынша көңіл көншітетін нәтижелер бар – дайын металл бұйымдар, химия және жеңіл өнімін шыға­ратын «Каспиан Оффшор», «Ерсай», «ГММОС Қазақстан», «Ақтауойлмаш», «Актау Нефте­сервис», «ҚазАзот» сияқты кәсіп­орындар арқасында өңдеу өнеркәсібінің көлемі 11%-ға пайызға артып, 132 млрд теңгені құрады. «Шағырлы-Шөмішті» газ кен орнының пайдалануға берілуі табиғи газ өндіру көлемін 14%-ға арттырып, 3 млрд текше метрге дейін өсірген. Сол сияқты құрылыс жұмыстарының көлемі 8 млрд теңгеге көбейді. Облыста 2015 жылмен салыстырғанда 10%-дық өсіммен 709 мың шаршы метр тұрғын үй пайдалануға беріліп, жаңа 25 мыңнан астам жұмыс ор­ны ашылды. Өңір өзінің стратегиялық даму бағыттары ретінде көлік логис­тикасы, құрылыс, туризм, әлеу­меттік сала мен мұнай-сервис кластері, агроөнеркәсіптік кешен бағыттарын анықтаған. Әр бағытқа жеке тоқтаған А.Айдарбаев өңір­дегі «Ақтау халықаралық теңіз-сауда портын солтүстік бағытта кеңейту, жол, ауыз су, спорт, білім беру, денсаулық сақтау, жұмыспен қамту, қолжетімді баспана, т.б. маңызды мәселелерге тоқталып, оларды шешу үшін жасалып жатқан жұмыстарды баяндады. Тікелей эфир арқылы тара­тылған кездесуде қатысушы­лармен бірге, аудан-қалалардан телефон арқылы сауалын, ұсыныс-пі­кі­рін жолдағандар болды. Кез­де­суде түскен тұрғындардың сұ­рақ­тарына алдағы уақытта жау­ап берілмек. Өңір азаматтары ай­мақ басшысының жасаған жұ­мыстарын оң бағалап, алдағы күндерге сәтті­лік тіледі. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы Суретті түсірген Серік МАЙЕМЕРОВ