Ешкімге ұқсамайтын дара жол

Қазақстан Республикасының Президенті билік тармақтары ара­сында өкілеттіктерді бөлу туралы халық­қа Үндеуінде: «Халықаралық тәжі­рибе шеңберінде іс-қимылдар жасайтын мәсе­лелер бола тұрса да, біз өзіміздің, кейде ерекше шешімдерімізді таба оты­рып, мемлекеттік құрылыстың бөгде модель­дерін көшіріп алумен ешқашан айналысқан емеспіз», – деген еді. Расында да, Қазақстан өзінің ешкімге ұқсамайтын ерекше жолымен жүріп келеді және қазіргі таңда әлемде «Қазақстан жолы» дамудың әмбебап және ілгері моделі ретінде мойындалған. Тәуелсіздіктің өткен 25 жылы ішінде Қазақстан Республикасы үлкен жетістіктерге қол жеткізді және жаңадан тәуелсіздігін алған елдердің ішінде ең бір орнықты мемлекетке айналды. Халықаралық сарапшылардың және әлемнің жетекші елдері лидерлерінің ортақ ой-пікірі негізінен: «реформа жүргізудегі қазақстандық тәжірибе табысқа және жетістікке ие» дегенге саяды, сондай-ақ, олардың тарапынан айрықша бағаланып келеді. Қазақстанда мықты президенттік республиканың қалыптасуы, ең алдымен, кемел ойлы, әлемге танымал және заман ағымына сай батыл қадам жасай білетін Нұрсұлтан Назарбаевтың тұлғасымен тікелей байланыстырылады. Нұрсұлтан Назарбаевтың жетістігі, бірінші кезекте, республикадағы саяси жағдай, Қазақстан халқының ментальды және психологиялық ерекшеліктері ескеріле отырып жүргізілген басты реформаларды жүзеге асырудағы ерен еңбегімен тамырласып жатыр. Осы жолы да Қазақстан Президенті билік тармақтары арасында өкілеттіктерді бөлуге қатысты қоғам алдына күрделі міндет қойып отыр. Бұл міндет екі негізгі бағыт бойынша іске асуы тиіс. Бұл тура­лы Нұрсұлтан Назарбаев былай деді: «Бірін­шіден, Президенттің әлеуметтік-эконо­ми­калық үдерістерді реттеудегі бір­шама өкілеттіктерін Үкіметке және басқа да атқарушы органдарға берген жөн. Екін­шіден, одан да күрделі міндет – би­лік тармақтары арасындағы қарым-қаты­нас­ты конституциялық деңгейде теңгерімді ету». Реформа бағдарламасының қабыл­дануы Қазақстанның өзінің «қазақ­стан­дық жолы» арқылы демократиялық даму­ға қарай сенімді түрде одан әрі қадам басып келе жатқанына тағы да көз жеткізе түседі. Николай СТЕПАНЕНКО, Украина-Қазақстан қатынастары мемлекетаралық институтының директоры