УЕФА Украинаның футбол клубтарын еурокубоктардан шеттетуі мүмкін

УЕФА Украинаның футбол клубтарын Еуропа турнирлерінен шеттетуі мүмкін. Бұл туралы «Плюс спорт» басылымына берген сұхбатында заңгер Дмитрий Коробко мәлімдеді. Бұл «Карпат» футбол клубы бұрынғы ойыншысы Владимир Гудымаға қатысты Львов қаласындағы Франковск аудандық сотында жеңіске жетуі, сондай-ақ Украина футбол федерациясының «Карпатқа» салған айыппұлын сот алып тастауы себеп болса керек. Себебі, ФИФА мен УЕФА-ның футбол ісіне мемлекеттің араласпауы туралы шарты бұзылды. «Карпат» үлкен бір іске себепші болайын деп тұр. Ертең-ақ, футбол федерациясының (УФФ) кез келген шешіміне Украинаның аудандық соттарының бірі наразылық білдіруі мүмкін. Ал УЕФА мұндайға көз жұма қарамайды. Өзге клубтар да соңын жалғамас үшін тиісті шаралар қолданады. Заңға қарсы әрекет жасалды. Себебі, мемлекет толығымен футбол ісіне араласып отыр. Бұл УЕФА мен ФИФА-ның заңына қарама-қайшы келеді», – деді заңгер. «Іс қиындап кетсе таң қалмаймын. Мұндай жағдайда «Карпатты» емес алдымен футбол федерациясын тексереді. УЕФА Украинаның барлық клубтарына еурокубоктік турнирлерге шектеу қоюы немесе УФФ-ның мүшелігін тоқтатуы әбден мүмкін», – деді Дмитрий Коробко.