«Қазақ елі» Каирде топ жарды

«Қазақ елі» анимациялық фильмі Каир қаласында өткен оныншы ха­лықаралық анимациялық фильмдер форумына қатысып, үш бірдей жүлдеге ие болды. Әдетте, үлкен істер Алматы мен Астанада атқарылатындай көрінеді. Ал осы түсініктің көбесін шымкенттік «Сақ» студиясының жігіттері сөкті. – Біздің студияда жасалған фильмді Каирдегі халықаралық фо­румға шақырту алған Шәкен Айманов атын­дағы «Қазақфильм» АҚ өз өнім­­дерімен бірге жіберген екен, дейді «Сақ» студиясының директоры Нурид­дин Патеев. – Каирде өт­кен фо­рум­ның маңыздылығы сол, оған АҚШ, Қытай, Ресей, Германия, Франция, Оңтүстік Корея сынды мемлекеттер қатысқан, 90-нан астам қысқа метражды және толық метражды фильм­дер ұсынылған. Осынау аламанда біздің «Қазақ елі» фильмі «Ең үздік толық метражды фильм» жүлдесіне ие болды. Картинаның композиторы Руслан Шынықұлов және фильмнің әуенін жазған музыкант Жанболат Әділов құрмет дипломдарымен марапатталды. – Бұл – қазақ анимациясы сала­сын­дағы ең үлкен жетістік, – дейді картинаның режиссері Батырхан Дәу­ренбеков. – Біз бұған дейін де шет елде осындай жобаларға фильмімізді ұсынғанбыз. Сонда анимация сала­сындағы шетелдік сарапшылар «Қазақ еліндегі» патриоттық тәрбиенің кө­рінісін жоғары бағалаған. Балаларды патриотизмге тәр­биелеуде өте құнды дүние болған­дықтан, барлық халыққа көрсетуге бола­тын туынды» деген пікірлерді естіп, қуа­нып қалған едік. Енді, міне, Каир­дегі фестиваль жеңістері сол пі­кірлер­дің шынайылығын дәлелдеді. – Ау, ағайын, жүлде қолдарыңа тиді ме? – «Қазақ елін» Шәкен Ай­ма­нов атындағы «Қазақфильм» жібер­генімен, мамандары бармағанға ұқ­сайды. Біздің естуімізше, бұл жүл­делерді Каирдгі Қазақстан елшісі қабылдап алған. Бү­гінде жолда келе жатқан болуы керек. – Үлкен студиялар жасайтын жұ­мыс­ты шағын студиямен-ақ атқарып, халықаралық сында үздік шығып жатасыңдар? Жан-дүниелеріңде не болып жатқанын түсінеміз. – Рас айтасыз. Осы хабарды естігелі Шымкентке сыймай жүрміз. Бұл біздің студияның ғана емес, осы жұмысқа тапсырыс берген Мәдениет және спорт министрлігінің, атап айтқанда, министр Арыстанбек Мұхамедиұлы мен тарих ғалымдарының докторы Жамбыл Артықбай және қазақтың көрнекті жазушысы Дулат Исабеков ағаларымыздың де жеңісі. «Қазақ елі» – ұжымдық еңбек. Сондықтан, барша қазақстандықтарды, фильмнің түсіру тобын осы жеңіспен құттықтағымыз келеді. «Сақ» киностудиясының негізін қалаған қос жігіт осылай дейді. Қазақтың алғашқы хандары Керей мен Жәнібек арқылы еліміздің тағдыр баяны көрсетілген фильм осылайша ірі жеңістерді бағындыра бастады. Бақтияр ТАЙЖАН, «Егемен Қазақстан» Оңтүстік Қазақстан облысы