Бүгінгі таңда тарихи уақыттың адам айтқысыз жылдамдықпен жылжып келе жатқаны – дау туғызбайтын шындық. Бұл әсіресе, жаһандық ақпараттық-коммуникация технологияларының өте тез әрі үздіксіз жаңаруынан айқын сезілуде. Осы үрдіс, сонымен қатар, алғашқы индустриялық революцияның қозғаушы күші болған көмір мен будың біртіндеп ығысып, мұнай мен газға, одан соң атом қуатына, енді, міне, Үшінші индустриялық революцияның энергия иіріміне айналып үлгерген балама қуат көздеріне орын бере бастағанынан да анық көрінеді. Бұл құбылыс, сонымен қатар, Төртінші индустриялық революцияның күретамыры болып отырған роботтану, биотехнология, информатика және нанотехнология синтездерінен туындап жатқан соны ғылыми нәтижелерден де анық байқалып отыр. Содан соң қайта қалпына келетін, әрі тек қана қоршаған ортадан алынатын таза энергия қорларының мүлде жаңа технологиялық деңгейде өндіріліп, жаңаша сақталып, алыс-жақын аймақтарға аса тиімді онлайн тәсілмен тасымалдану мүмкіндігі де бүгінгі адамзат санасына қона бастады. Өз кезегінде аталған құбылыстардың геосаясатқа да, мемлекетаралық қарым-қатынастар мен нарықтарға да, сол сияқты, азаматтық қоғамдардың жаңаша қалыптасып, жаңаша дамуына да тікелей әсер ете бастағаны күмән тудырмайды. Өйткені, мегаөзгерістер толқыны қазірдің өзінде-ақ айқын сыр беріп, планета тынысының болашақ болмысын болжайтын футурист-философтарды да, физиктерді де, экологтар мен биологтарды да, макроэкономистер мен микроэкономистерді де, мемлекет тізгінін ұстаған саясаткерлерді де жаппай ойландыра бастағаны шындықтан алыс емес. Мәселен, Елбасы Нұрсұлтан Назарбаевтың соңғы Жолдауы – жоғарыда айтылғанның айқын дәлелі. Бұлай деуге толық негіз бар. Өйткені, өзге елдер секілді дамудың тұрақты жолын таңдаған біздің мемлекетіміз де технологиялық мегаөзгерістер ағынынан тыс қалып отырған жоқ. Кезінде қол жетпестей болып көрінетін қиял-ғажайып дүниелер бүгінгі Қазақстанның күнделікті болмысына қалай тез еніп кеткенін де байқамай қалдық. Тастан сарай да салдырып, айшылық алыс жерлерден жылдам хабар да алғызып, сәйгүлік тұлпарларды автокөлік пен ұшақтар, хат пен хабарды SMS, телефон стансалары мен пошта қызметін ұялы телефондар, сия мен қаламды компьютерлер, кітапханаларды интернет-порталдар, баспаханаларды принтерлер, кинотеатрларды телевизор мен видеотекалар алмастырып отырғанына да етіміз әлдеқашан үйреніп кетті. Оны былай қойғанда, бүгінде тұтынушылардың қолында жүрген алақандай ғана айфондар мен планшеттер бүкіл ақпараттық-коммуникация технологияларының көмегімен іске асырылатын қызмет түрлерін түгел қамтамасыз ететін әмбебап құралға айналып кеткені де үйреншікті жай болып қалды. Мұның сыртында «Google», «Yahoo», «Yandex» секілді ақпарат іздеу жүйелерінің көмегімен бүгінгі таңда кез келген қазақстандық бүкіл адамзат өркениетінің рухани құндылықтарының ғаламтор желілерінде жинақталған ұлан-ғайыр қоймаларына сүңгіп кетіп, ғылым мен білімнің, өнер мен ілімнің әр саласына қатысты ұғымдар мен терминдердің кез келгенін қас-қағым сәтте суырып алып, керегіне жаратып отыр. Демек, бүгінгі таңда қалыптасып отырған әлемдік геосаясат картасынан біздің еліміз шет қалып отыр деуге ешбір негіз жоқ, себебі, бүкіләлемдік ақпарат мұхитынан сусындау өз еліміздің де шексіз игілігіне айналып кеткені күмәнсіз. Тәуелсіздік тізгініне ие болған ширек ғасыр ішінде Қазақстан әуел баста қолбайлау болған экономикалық қиындықтарды артқа тастап, бүгінде дамудың тұрақты жолына түсіп қана қоймай, бүкіл планетаға танылып, әлемдегі экономикасы қарышты дамып келе жатқан санаулы мемлекеттердің санатына қосылды. Мұны қалайша оң үрдіс деп қабылдамайсың?!.
Әділ АХМЕТОВ,
Қазақстанның еңбек сіңірген қайраткері
