Қарым-қатынас қарқын алып келеді

Сыртқы істер министрлігінде Қазақстанның Малайзиядағы Төтенше және өкілетті елшісі Данияр Сәрекеновтің қатысуымен журналистерге арналған брифинг өтті. Екі ел арасындағы дипломатиялық қарым-қатынас орнауының 25 жылдығына орай ұйымдастырылған шара аясында саяси-экономикалық әріптестіктің жай-күйі баяндалды. Елшінің айтуынша, Қа­зақстан мен Малайзия – бір-бірінен қашық орналасқан елдер. Сондықтан алыс-беріс пен барыс-келістің көрсеткіштері керемет деп айтуға келмейді. Дегенмен, ауызды құр шөп­пен сүртуге де болмайды екен. «Өткен жылы екі ел ара­сындағы сауда айналымы 300 млн АҚШ доллары шамасында болса, оның 155,7 млн-ын экспорт, 138,69 млн долларын импорт құраған. Ал біздің елден қара металл өнімдері мен одан жасалған бұйымдар, геодезикалық жә­­не өлшеу құралдары, түр­лі өлшемді құбырларға арналған фитингілер шыға­рылса, Малайзиядан келетін тауарлардың ішінде жеңіл өнеркәсіп өнімдері мен электроника, құрал-саймандар мен бөлшек бұйымдар бар. ЭКСПО көрмесі арқы­лы әлем елдерін «жасыл эко­номикаға» көшуді ұсынған Қазақстанның бастамасын қолдайтын Малайзия соңғы үлгідегі технологиялық тәжі­рибелерімен де бөлісуге дайын әрі осы бағытта өзара ынтымақтастық орнаған», – деді Д.Сәрекенов. Ширек ғасыр ішінде Қа­зақстан мен Малайзия арасында мәдени-гуманитарлық әріптестік те орнап үлгерген. Әсіресе, Қазақстан-Малайзия бір­лескен жұмыс тобы құры­луының нәтижесінде бүгінгі таңда Малайзияда 1,5 мыңға жуық студент түрлі сала бо­йын­ша білім алуда. Сондай-ақ, 2012 жылдан бері аталған елде Қазақ әдеби орталығы да жұмыс істей­тіндігін қапер­леріңізге сала кетейік. Брифинг барысында елші айрықша атап өткен деректің бірі – инвестициялық саясат пен ғылыми-техникалық және инновациялық ба­ғыт­тағы байланыстардың да ны­ғайып келе жатқаны болды. Бүгінгі таңда еліміздің ауыл шаруашылығы мен құрылыс саласы және мұнай-газ жобаларын жүзеге асыру бойынша көптеген ма­лайзиялық бірлескен компаниялар қызмет көрсетеді. Олар өткен жылдың өзінде Қазақстанға инвестиция ретінде айтарлықтай қар­жы құйған болса, соның ішінде соны технологиялар мен инновациялық жа­ңашылдықтардың өндіріске енгізілуіне басымдықтар бе­ріліпті. Нұрлыбек ДОСЫБАЙ, «Егемен Қазақстан»