Астанадағы Бейбітшілік және келісім сарайында Қазақстан халқы Ассамблеясының Алғыс айту күніне арналған форумы өтті. Оған Мемлекеттік хатшы Гүлшара Әбдіқалықова, ҚХА Төрағасының орынбасары – Хатшылық меңгерушісі Ералы Тоғжанов, сондай-ақ, мемлекеттік органдардың басшылары, ҚХА мүшелері, этномәдени және жастар бірлестіктерінің, аналар кеңесінің, қоғамдық келісім кеңесінің, ғылыми-шығармашылық зиялы қауымның өкілдері, халықтың дәстүрлі қолөнер шеберлері, меценаттар, жастар қатысты.
Форумды ашқан Мемлекеттік хатшы: «Бірлігі жарасып, ынтымағы артқан тәуелсіз Қазақстанда Алғыс айту күні ел өміріндегі елеулі датаға айналды», дей келе, аталған мерекеге байланысты Қазақстан Президентінің халыққа арнаған құттықтауын оқып берді.
Елбасы өзінің құттықтау сөзінде: «Алғыс айту күні – біздің мемлекеттік және қоғамдық күнтізбемізде жақында ғана пайда болған ерекше күн. Алайда, бұл мереке шын мәнінде терең тарихи іргетасқа негізделген. Ол адамның бойындағы ең асыл қасиеттер – мейірімділік, рақымдылық, өзара қолдау-көмек, өзін өзі құрбан ету барынша көрініс тапқан алмағайып заманды еске салады. Алғыс айту күнін атап өте отырып біз, бір жағынан, халқымыздың рухани қаһармандығына құрмет көрсетіп, өткенге көз жүгіртеміз. Ал, екінші жағынан, адамгершіліктің айнымас негіздері арқылы жол тартылған болашаққа зор сеніммен қараймыз», – деген.
Сонымен қатар, Мемлекет басшысының құттықтауында: «Мен Тәуелсіз елімізді бірлесіп құрып жатқан Қазақстан халқына ынтымағы мен ерік-жігері үшін алғыс айтамын. Қайырымдылық пен өзара көмек көрсету дәстүрінің одан әрі нығая түсетініне сенімдімін. Алғыс айту күнімен баршаңызды шын жүректен құттықтаймын! Баршаңызға бақыт, отбасыларыңызға игілік, достық пен өсіп-өркендеу тілеймін!», – делінген.
Бұдан кейін Қазақстан халқы Ассамблеясы Төрағасының орынбасары Е.Тоғжанов, «Алеф» еврей мәдени-ағарту қоғамының жетекшісі М.Гольдберг, Қазақстан корейлері қауымдастығының өкілі А.Югай өзара түсіністік пен қолдау еліміздің рухани қағидатына айналғанын айтты. Мәселен, Ералы Тоғжанов өткен жылы Президенттің Алғыс айту күнін мерекелеу туралы Жарлыққа қол қойғанына тоқтала келе, 1 наурыз – Қазақстан халқы Ассамблеясының негізі қаланған күн екенін де атап өтті. «Алғыс айту – адамгершіліктің белгісі. Оның өзегінде қайырымдылық, мейірімділіқ, өзгеге қолұшын созу, шын жанашырлық таныту секілді ізгі қасиеттер жатыр. Демек, осынау ерекше күннің азаматтарды біріктірудегі әлеуеті орасан», – деді ҚХА Төрағасының орынбасары – Хатшылық меңгерушісі.
Ал Қазақстан корейлері қауымдастығының өкілі Александра Югай: «Биыл корей ұлтының киелі қазақ жеріне табан тірегеніне 80 жыл толды. Осы жылдар ішінде бізге көрсеткен ықылас-ниеттеріңіз үшін ата-бабамыздың атынан бас ие отырып, Қазақ елі мен жеріне алғыс айтамын. Аға буын өкілдерінің әрқайсысының жүрек түкпірінде: «Қазақ еліне мың алғыс!» деген сөз бар деп ойлаймын. Сондықтан, 1 наурыз – Қазақстанды мекендеген әрбір азаматқа өз Отанына алғыс білдіруіне мүмкіндік беретін маңызды күн. Бұл – жылылық пен мейірімділік мерекесі», – деді.
Форумға қатысушылар Қазақстанның сәндік-қолданбалы өнер шеберлерінің киізден жасаған бұйымдары қойылған «Жан жылуы» атты экспозициялық көрмені тамашалады. Ал іс-шара соңында Ассамблеяның жаңа мүшелеріне Қазақстан халқы Ассамблеясы куәліктерін салтанатты жағдайда табыс ету рәсімі өтті, сондай-ақ халыққа және ел Президентіне алғыс білдірген үндеу қабылданды.
Ләйла ЕДІЛҚЫЗЫ, «Егемен Қазақстан»
Суреттерді түсірген
Ерлан ОМАРОВ,
«Егемен Қазақстан»
