Бауырын анасына бөліп берген

Адам ағзаларына жасалатын күрделі отаның бірі – бауыр ауыстыру. Өңірлер арасында бұл әдісті бүгінде ақтөбелік дәрігерлер тәп-тәуір меңгеріп қалғаны бай­қалады. Таяуда алты сағат­қа созылған ота сәтті өтті. Ота­ның тағы бір ерек­шелігі – ла­пароскопиялық тәсіл­мен жасалғанында. Маман­дардың мәлімдеуінше, мұндай жағдайда жалаңдаған хирург пышағы ашықтан-ашық тәнді тілгілемейді. Соның әсерінен жарақат та, оның тілігі де аз болады. Сол себептен жараның орны да тез бітіп, жазылып кетеді. Бұл осындай озық әдіс­­пен іске асқан еліміздегі екін­ші ота болып шықты. Ал алғашқы ота өткен жылы қа­зан айында республикалық эндоскопистердің конгресі ке­зінде жасалған. Бұл жолы Ақтөбеде 24 жастағы қыз 48 жастағы анасына бауырының жартысын берген. Отаны Сеул ұлттық университетінің профессоры Кванг Вунг Ли мен ақтөбелік хирург-мамандар бірлесіп жаса­ды. Қазір бой жеткеннің де, анасы­ның да жағдайы бірқалыпты. Деген­мен, олар аурухана­дан шыққаннан кейін де дәрігер­лердің бақылауында болмақ. Облыстың бас хирур­гі Ерлан Сұлтан­гереев­тің ай­туын­ша, ақтөбелік дәрігер­лер ла­па­рос­ко­пиялық әдісті ко­реялық хирургтардан үйреніп, атал­ған елде білімдерін жетіл­діріп қайтыпты. Темір ҚҰСАЙЫН, «Егемен Қазақстан» АҚТӨБЕ