Алкогольды ішімдік ішіп, қоғамдық тәртіпті бұзғандарға жазаны қатаңдатпай болмайды. Өз міндеттеріне салғырт қараған ондайларды түрмеге дейін отырғызу шаралары қарастырылса, құба-құп балар еді.
Құқық қолдану тәжірибелерінің өзекті мәселелері бойынша өткізілген ғылыми-практикалық конференцияда жұртшылықты мазалайтын маңызды жайттар, ювеналдық полицейлер, учаскелік полиция инспекторлары, жол-патрульдік қызметтеріне қатысты мәселелер қамтылды. Десек те, тиісті заңнамаларға өзгерістер енгізу шеңберінде заңгерлер тарапынан айтылған ұсыныстардың өзектісі – ішімдікке бейім адамдарға қолданылатын жазаларды күшейту.
Соңғы кездері өңірде әкімшілік айыппұлды төлемеушілердің саны әлдеқайда артқан. Былтыр 12 мыңнан астам адамға әкімшілік хаттамалар толтырылып, 114 миллион теңге айыппұл салынса, оның жартысы ғана өтелген. Араларында ақыл-есінен айрылғанша ішіп, қоғамдық тәртіпті бірнеше мәрте бұзғандар да аз емес. Олардың басым бөлігін еш жерде жұмыс істемейтіндер мен ішімдікті суша сіміретіндер құрайтындықтан, айыппұл өндіру өте қиын. Сондықтан мұндай санаттағыларды түрмеге қамап, түзеу жұмыстарына да мәжбүрлеу керек. Ол үшін заңнамаға өзгерістер енгізілуін қолдаймыз. Қазіргі заңнама нормалары бойынша айыппұл салумен ғана шектеліп жүрміз, дейді солтүстікқазақстандық полицейлер.
Қоғамдық тәртіп сақшыларының пікірінше, айыппұлдық жаза түрімен қоса, қылмыстық құқық бұзушылық шаралары да қолданылса, аяғын аңдап басатындардың санының көбейе түсері анық.
Өмір ЕСҚАЛИ,
«Егемен Қазақстан»
Солтүстік Қазақстан облысы
Соңғы жаңалықтар
