Рульде де, өмірде де әдемі

Әйелдер мерекесі қарсаңында Қостанайда қыз-келіншектердің «Рульде арулар» атты автошеруі өтті. Облыстық жастар ресурсы орталығы бастап, жергілікті полиция қызметі қостап өткізген бұл шараның басты мақсаты – көлік жүргізуші әйелдер тарапынан жол ережесінің бұзылмауын насихаттау және мерекеге тарту, жаңашылдыққа, батылдыққа, сұлулыққа құрмет болатын. Мұндай шеру Кеңес Одағы тұсында 1936 жылы өткізілген екен. Оған «ЗИЛ» жүк машинасын жүргізетін 45 әйел қатысыпты. Ал біз бүгін әйелдер ең сақ, жол-қозғалыс ережесін бұлжытпай орындайтын жүргізушілер екенін көрсетеміз, – деді облыстық жас­тар ресурсы орталығының бөлім жетекшісі Снежана Шандр. Әйел жүргізушілер отырған көлік шеруінің тағы бір ерекшелігі, машиналардың барлығы оның иесінің қиялы жеткен жерге дейін безендірілді. Олар машина арқылы түрлі образдар жасауға тырысты. Сәукеле «киген», мультфильм кейіпкерлерімен, 8 наурыз бен жүрекшелерді көр­сеткен машиналардан жолдағы жүргіншілер көзін ала алмады. – Рульге қыздар мен келіншектер отырған машиналар шеруінің әдемілігінде шек болған жоқ. Біз нұсқаушы айтқан ереже шегінен шықпай, жүріп отырдық. Барлық машиналар бізге құрметпен дабылын қосып жатты. Машинаны түнімен отбасымызбен безендірдік. Қазір машина рулінде отыру әйелдер үшін сән емес, бұл күнделікті тірлікте өте керек, – дейді шеруге қатысқан Адина Қалиева. Автошеруге 23 машина қа­тысты. Байқаудың соңында де­меушілер қыз-келіншектерді ме­рекесімен құттықтап, оларға сый­лықтар табыс етті. Жастар рес­ур­сы орталығының волонтерлері енді мұндай автошеруді жыл сайын өткізуді ойлап отыр. Нәзира ЖӘРІМБЕТОВА, «Егемен Қазақстан» ҚОСТАНАЙ