Этносаралық келісім – тұрақтылық негізі

Біз – қазақстандықтармыз!

18 сәуірде Қазақстан халқы Ассамблеясының кезекті XVІІ сессиясы болады * * * Біздің еліміздің ең басты жетістігі – ортақ Отанымыздағы шынайы салтанат құрған ұлтара­лық келісім, берік орныққан бейбітшілік пен тұрақтылық. Бұл – уақыт шындығы. Осының нәти­же­сінде еліміз өзінің мемлекеттігін нығайтып, түрлі салалар бой­ын­ша реформаларды табысты жү­зеге асырды. Бұлар халықтың әлеуметтік-экономикалық жағдайы­ның еселеп артуына ерекше ықпал етті. Оның шапағатын бүгінде барша қазақ­стан­дықтар жете сезініп отыр. Қазақстанда қоғамның барлық са­ла­сын­да ел азаматтарының этностық тең құ­қылығы заңнамада бекітіліп, тәжі­ри­бе жүзінде іске асырылған. Ең бас­ты­сы, елімізде этносаралық өзара ық­палдастық­тың басты тетігі ретіндегі бірегей қоғам­дық-саяси институт – Қа­зақстан халқы Ассамблеясы құрылған. Оны Қазақстан Республикасының Тұң­ғыш Президенті Нұр­сұл­тан Назарбаев бас­қарады. Мемлекет бас­шы­сы­ның көрегенді сая­са­­ты­ның ар­қасында Ас­сам­­блеяның этнос­ара­лық ауыз­бір­лікті нығай­ту­дағы рөлі ерек­ше екен­­дігін әлем­­дік қоғамдас­тық тәжірибе жүзін­де мой­ын­даған. Қа­зақстандық осынау бірегей мо­дельді өз­де­рінде пайда­ла­ну­ға көпте­ген мемлекеттер қызығушылық таны­тып отырғаны бізді шынайы ризашы­лыққа бөлейді. Еліміз өз тәуелсіздігін алған кезден бастап Президентіміз этностар ара­сында татулық орнықтыруды бірінші кезекке қойды. Олардың тілін, салт-дәстүрін, мәдениетін дамытуларына мемлекет тарапынан жан-жақты қолдау көрсетілді. Елбасы Нұрсұлтан Назар­баевтың басшы­лы­ғымен көрсетілген қамқорлықты Қа­зақ­станда тұрып жат­қан этностар барын­ша сезініп, өзде­рі­нің болашағына нық сеніммен қарады. Мемлекет басшы­сы­ның елдің келешегіне, өсіп-өркендеуіне, жан-жақты да­муына бағытталған барлық баста­маларына қолдау көрсетті. Олар­дың жүзеге асырылуына белсене атса­лыс­ты. Қазір олар соның жемісін көріп отыр. Бұған қатысты мысалдар да толып жатыр. Мысалы, еліміздегі этнос­тардың барлығының дерлік ұлттық-мәдени орталықтары қызмет етеді. Ұлттық мектептер жұмыс істейді, телеарналар орыс, ұйғыр, өзбек, тағы басқа тілдерде хабар таратады. Мерзімді басылымдар да тұ­рақты шығып келеді. Осының барлығы Елбасының тікелей басшылығымен бо­лып жатқан игі де өміршең істер екендігін біз өте жақсы түсінеміз. Қазақстан Республикасының кезектен тыс президенттік сайлауында қа­зақ­стан­дықтар Нұрсұлтан Назарбаевты Президент етіп қайта сайлады. Ел­басына сай­лаушылардың 95,55 пайызы сенім білдіріп, өз дауыстарын берді. Осылайша, олар өз болашақтарын, Тәуелсіз Қазақ­станның өсіп-өркендеуін Тұңғыш Президент Нұрсұлтан Назарбаевпен әрі қарай байланыс­ты­ра­тын­дарын көрсетті. Міне, бұл қазақ­стан­дықтардың Елбасыға, оның жүргізіп келе жатқан салиқалы сая­сатына шын жүректерімен сенгендік­тері­нің нақты да жарқын көрінісі деп білемін. Ал Қазақстанда мекендейтін сай­лаушы-этностар өкілдерінің барлығы сайлауда Президент Нұрсұлтан Назар­баев­қа дауыс берді деп ойлаймын. Өйт­кені, мемлекет құраушы ұлтқа да, өзге этностарға да тұрақтылық, татулық, ауыз­бірлік қашанда қажет. Елімізде өзек­ті бұл мәселе шешілген, нық орныққан. Оның негізін қалаған, еңселі елімізді әлем жұртшылығына танытқан Президентіміз Нұрсұлтан Назарбаев! Президенттік сайлау науқаны кезінде мен Президент Н.Ә.Назарбаевтың канди­датурасын қолдау жөніндегі Ал­маты қалалық қоғамдық штабының мү­шесі болдым. Қала бойынша сайлау­шылармен көптеген кездесулер өт­кіздік. Сондағы байқағаным,  электорат Президентімізге ерекше қолдау көр­сетті. Тәуелсіздіктен бергі кезеңдердегі еліміздің қол жеткізген табыстары, сыртқы саясаттағы жетістіктері, этнос­аралық ынтымақ, шешімін тапқан өзге де мәселелердің барлығы Мем­лекет басшысының білгірлікпен жүр­­­гізген саясатының жемісі мен нә­тижесі екендігі кездесулер барысында кө­рініп тұрды. Осының түп негізінде бірлік пен ынтымақ, тұрақтылық пен татулық жатыр. Бірлігіміз, ынтымағымыз әрқашан да жараса бергей. Асимжан ЗЛАВДИНОВ, Қазақстан халқы Ассамблеясының мүшесі,  «Қазақстан ұйғырлары» республикалық этномәдени қоғамдық бірлестігі төрағасының орынбасары. Алматы.