Іс-шараға Алматы қаласы ҚХА төрағасының орынбасары Қазбек Мамсұров, Алматы қаласы ҚХА Аналар кеңесінің белсенділері, Алматы татар қоғамдық-мәдени орталығының басшылығы, Қазақстан татарлары мен башқұрттары қауымдастығының өкілдері, Алматы қаласы мәслихатының депутаттары, ҚХА мүшелері, республикалық және қалалық этномәдени бірлестіктердің өкілдері, жастар ұйымдарының мүшелері, БАҚ өкілдері мен ҚХА өзге де құрылымдарының басшылары қатысты.
Жиында Елбасы ұсынған жаңа реформалардың халық тарапынан қуатталып іске асуы жайы сөз болды. Ел экономикасының қарыштап дамып, кеңге қанат жаюына, елдің саяси өміріндегі жаңа өзгерістер арқылы халықтың әл-ауқаты артып, демократиялық үдерістердің алға жылжуы сияқты негізгі жетістіктерге жол ашатын жаңа реформа ел тарихындағы елеулі оқиға деп бағаланды. Қазақстан халқы Ассамблеясының Алматы қаласы бойынша төрағасының орынбасары Қазбек Мамсұров: «Елбасы ұсынған жаңа реформаны талқылау кезінде ҚХА бар ерік-жігерімен қызмет жасады. ҚХА аясында реформаны талқылауға арналған 400-ден астам іс-шара өтті. Сондай-ақ, «Қазақстанның Үшінші жаңғыруы: жаһандық бәсекеге қабілеттілік» атты Елбасымыздың жаңа Жолдауы да өзінің маңыздылығы мен өзектілігін көрсетуде», деді өзінің сөзінде.
Шара барысында Жолдауда айтылған негізгі басымдықтар да сөз болды. «Біздің елімізде үлкен өзгерістер жүзеге асуда. Қиындықты еңсеріп, Тәуелсіздікті нығайту жолында халқымыз талай жолдан өтіп келеді. Бұл – басқарудың жаңа тетігі. Уақыт пен заман талабына қарай әр нәрсе өзгеріп дамып, алға жылжып отырады. Осындай жауапты кезеңде Алматы қаласы Аналар кеңесі атынан саяси бастамаларға қолдау көрсету мақсатында
жиылып отырмыз. Өйткені, бұл – біз бен сіздің болашағымыз, келешек ұрпақтарымыздың жарқын өмірі. Елбасымыз Нұрсұлтан Әбішұлы Назарбаев өзінің жаңа Жолдауында да білім сапасын арттыруға, денсаулық сақтау қызметін одан әрі дамытуға, әлемдік дамыған жаңа технологияларды меңгеруге, халықтың әлеуметтік-экономикалық жағдайын жақсартуға баса назар
аударып отыр. Сондықтан, ұлт болып ұйысып, жұрт болып жұмылып, Президентіміздің жарқын бастамаларының іске асуына әр саланың мамандары өзіндік үлесімізді қосуымыз қажет», деді Аналар кеңесінің төрайымы Нурия Ниязова.
Қазақстан халқы Ассамблеясына қарасты этномәдени бірлестіктердің өкілдері де өз ойларын ортаға салып, жаңа реформа жаңа белестерді бағындыру жолындағы берік көпір екендігін айтты.
Арман ОКТЯБРЬ,
«Егемен Қазақстан»
АЛМАТЫ
