Шараны облыс әкімдігінің жастар саясаты мәселелері басқармасы ұйымдастырып, жастарды Жолдауда көрсетілген негізгі мақсаттар мен міндеттерді жүзеге асыруға атсалысуға шақырды.
Сонымен қатар, аталған жиында Тараз қаласындағы жастардың түрлі санаттарына арналған «Кеңес беру алаңы» да құрылды. Бүгінде жұмыссыз, мүмкіндігі шектеулі, сондай-ақ жеке кәсібін ашуға немесе кәсібін дамытуға ниетті жастардың да түрлі бағыттағы мемлекеттік қолдау тетіктерін пайдалануға мүмкіндігі бар. Облыста әлеуметтік және құқықтық көмекті қажет ететін жастар да жетерлік. Шарада осы мәселелерге басымдық беріліп, бірқатар ойлар да айтылды.
Ал жоғары және орта арнаулы оқу орнын бітіруші студенттердің алдында да болашақта жұмысқа орналасу мәселесі тұрады. Жиында Тараз қаласы әкімінің орынбасары Кенжебек Олжабай мен басқарма басшысы Мәди Мәтен жастардың түрлі мәселелеріне тоқталып, нақты жоспарларды ұсынды. Мұндағы негізгі басымдық – жастарды жұмыспен қамтуға беріліп отыр. Сондай-ақ, жастардың кәсіпкерлік әлеуетін арттыру да, олардың өзін өзі жұмыспен қамтуға баулу да күн тәртібіндегі мәселе. Ал Мәди Мейірбекұлының айтуынша, болашақта біраз жас «Кеңес беру алаңы» арқылы жұмысқа орналасып, кәсібін ашып, қоғамға қызмет ететін болады. Сондай-ақ, «Кеңес беру алаңының» жұмысына облыс әкімдігінің басқармалары мен мемлекеттік органдар қызметкерлері, қаржы секторларының мамандары да қатысты.
Айта кетейік, аталған басқарманың ұйымдастыруымен үстіміздегі жылдың ақпан-наурыз айларында «Елбасы Жолдауы – жаңғырудың жаңа кезеңі» атты облыстық автокеруен облыстың барлық аудандарында болып, кеңес беру алаңдарын ұйымдастырған болатын. Аталған шараға 14-29 жас аралығындағы әрбір ауыл, елді мекендердегі түрлі санаттағы жастар қатысқан. Мұнда жалпы саны 3 мыңға жуық жасқа кеңес берілген еді.
Бүгінде елімізде жастарға арналған «Дипломмен – ауылға!», «Серпін», «Бизнестің жол картасы», «Жастар практикасы» сияқты ірі бағдарламалар бар. Бұл өз кезегінде жастардың ауылшаруашылық және кәсіпкерлік бағыттарында да жұмыс істеуіне жағдай жасайды. Ал облыс орталығында өткен жиынның қорытындысы бойынша, 1000-ға жуық жасқа кеңес берілді. Келешекте де жастар «Кеңес беру алаңы» арқылы өз мәселелерін шеше алатын болады.
Хамит ЕСАМАН,
«Егемен Қазақстан»
Жамбыл облысы
