Қазақстанның Бразилиядағы Төтенше және өкілетті елшісі Қайрат Саржанов осы елдің мемлекеттік органдар қызметкерлеріне, академиялық, қоғамдық және іскерлік топтар өкілдеріне, Латын Америкасы мемлекеттері елшіліктерінің дипломаттарына Мемлекет басшысы Нұрсұлтан Назарбаевтың «Қазақстанның Үшінші жаңғыруы: жаһандық бәсекеге қабілеттілік» атты Жолдауының негізгі қағидаларын түсіндіру бойынша брифинг өткізді.
Қ.Саржанов ұсынылған экономикалық Үшінші жаңғырудың жаңа жоспары тек қана жаһандық сындар мен қатерлерге қарсы күрес бойынша міндеттер емес, болашақ экономикалық өсудің берік көпірі екенін атап көрсетті. Сондай-ақ, ол Мемлекет басшысы белгілеген экономиканы реформалау мен жаңғырту және Қазақстанның жаһандық бәсекеге қабілеттілігін қамтамасыз ету бойынша 5 басымдықтарға екпін берді.
Брифингке қатысушылар экономикалық жаңғырудың маңызды құжат екеніне назар аударды. Олардың пайымдауынша, жедел технологиялық жаңғыру жөніндегі жоспардың сәтті іске асырылуы ел дамуына ерекше серпін бермек. Мәселен, Бразилия Ұлттық конгресінің бұрынғы депутаты, «Uniao Planetaria» (Бразилия планетарлық одағы) ұйымының басшысы, «TV-Supren» телеарнасының президенті Улисис Ридель, Бразилия университеті Халықаралық қатынастар институтының профессоры Алсидис Ваз Жолдаудағы басымдықтардың орындалуы Қазақстанды әлемдегі аса дамыған 30 елдің қатарына қосатынына сенімді екендіктерін білдірді.
