Қазақстанның еңбек сіңірген қайраткері Алма Кәкішеваның режиссерлігімен көрермендерімен қауышқан жаңа қойылым өнерсүйер қауымның ыстық ықыласына бөленді. Драманың авторы – Мәдина Омарова. Аталған спектакль Ұлы Отан соғысы жылдары тылда қалған халықтың басындағы ауыр халді суреттейді. Алапат майдан елдегі ер-азаматты түгел сыпырып алып кеткенде, барлық қиямет-қиыншылық ауылда қалған шал-кемпір, бала-шаға мен әйелдердің мойнына қыл шылбыр болып ілінді. Сол бір кез тағы бір сұмдығымен тарихта қалды. Ол – кеңес өкіметінің саясатына қайшы болып көрінген ұлттарды туған жерінен айырып, басқа мекенге депортациялау болатын. Қуғын-сүргінге ұшыраған ұлт өкілдері қазақ ауылдарына келді.
Қойылымға арқау болған негізгі тақырып осы. Ел мен елдің, ұлт пен ұлттың бауырласу процесі, ұлтымыздың қонақжайлылығы кең мазмұнда көрініс тапқан. Туындыда қазақтың өзі қайғыдан қан жұтып, аш-жалаңаш отырса да, пана іздеп келген жұртты сыртқа теппей, аялы алақанын қалай ұсынғаны баяндалады. Соғыс жылдары халықтың басына түскен нәубет, күштінің әлсізге көрсеткен өктемдігі, қарапайым ауыл адамдарының тіршілігі, бүкпесіз де боямасыз қалпында берілген.
Спектакльдегі негізгі кейіпкерлерді Бауыржан Қаптағай, Омар Қиқымов, Данагүл Темірсұлтанова, Бақтияр Қожа, Гүлнәр Жақыпова, Ғайникамал Байқошқарова және тағы да басқа театрдың танымал әртістері сомдады. Театр сыншылары қойылымға жақсы деген баға берді «Төрт бірдей ұлынан айырылған Ағираның «Қаралы қағаз маған бала бола ма?» деген сөзі соғыс кезіндегі аналардың бейнесін көз алдыма әкелді. Қойылымдағы ауылбасының әйелі болып ойнаған Нұржан Бексұлтанованы ерекше атап кеткім келеді. Халықты жылата да, күлдіре де білді», дейді театрдың тұрақты көрермені Жасұлан Наурызалиев.
Өнер десе ішер асын жерге қоятын көрермен қауымды тәнті еткен жаңа қойылым халықтың ілтипатына бөлене береді деген сенімдеміз.
Арман ОКТЯБРЬ, «Егемен қазақстан»
АЛМАТЫ
