Теория мен тәжірибе ұштасты

Өтпелі кезеңнен еліміз аман өтті. Тәуелсіздіктің 20 жыл­­­дығына толайым табыс­тармен жетіп отыр. Елбасы биылғы «Бо­ла­шақтың іргесін бірге қалай­мыз» атты Жолдауында ауыл ша­руашылығына аса терең мән берді. Әсіресе, мал шаруа­шылы­ғын дамытуға, ет өндіруді артты­ру тапсырмасы алға қойыл­ды. Осыған орай Үкімет арнайы «Сыбаға» бағдарлама­сын қолға алды. Экспортқа ет шығарамыз. Сөйтіп, алыс-жа­қын елдерді етпен қамтамасыз етеміз. Бұл құр қиял емес. Мемлекет­тің алдына қойылған талап. Қызылорда – Сырдың бойы­на егін салып, қырға мал жай­ған аймақ. Шаруаға қолайлы, егінге ыңғайлы жер. Бір ғана күрішінің өзімен аты алты құр­лыққа жайыл­­ған облыстың бү­гінгі күйі де жаман емес. Об­лыс шеңбе­рінде ауыл шаруашы­лы­ғы­мен айналысып жатқан ша­руа­­шы­­лықтар бас қосты. Сөйтіп агро­өнер­кәсіп кешені қызметкер­лері­нің слеті өтті. Оған көрші об­лыстардан арнайы қонақтар келді. Сондай-ақ ғалымдар да қатыс­ты. Жиын барысында ауыл ша­руа­шылығына қатысты мәселе­лер қоз­ғалып, жеткен жетістіктер са­ра­ланып, алдағы асулар ай­қын­далды. Сырдың жұрты республика бойынша жиналатын күріштің 90 пайызын өндіріп отыр. Артық айтты демеңіз, Қызылорда облы­сы елімізді тұтастай күрішпен қамтуда. Былтыр облыс соңғы жиырма жылда қол жеткізбеген өнімді жинаған. Бұл аймақта күріш өндірісі күн санап қарқын алып келе жатыр деген сөз. Ал оның дамуына мемлекеттің көр­се­­тіп отырған көмегі көл-көсір. Мәселен, 2003 жылы облыстың ауыл шаруашылығын дамытуға мемлекеттен 142,8 миллион теңге бөлінген екен. Былтыр бұл көмек 2,3 миллиард теңгеге жеткен. Осыған сәйкес ауыл­шаруа­шылық өнімдерінің өндіріс көлемі де өсіп келеді. Мысал үшін айтар болсақ, 2000 жылы ауыл шаруа­шылығының жалпы өнімі 8,6 миллиард теңгені құрапты. Енді 2010 жылдың деректеріне көз жүгіртіңіз. Былтыр ауылшаруа­шылық өнімдерінен 44,2 миллиард теңге пайда түскен. Сандар осылай сөйлейді. Мал шаруашылығында да алға жылжу байқалады. Нақты деректер келтірейік. 2000 жыл­мен салыстырғанда мүйізді ірі қара – 55,1, қой мен ешкі – 44,2, жылқы – 35,1, түйе 56,8 пайызға артқан.  Келтірілген санға қарап сүйсінуге болады. Бірақ облыс­тағы мал басының 96 пайызы жеке қолда. Мемлекеттің қарауын­дағы малдың саны өте аз. Дегенмен бұл олқылықтың орнын елімізде жұмыс істей бастаған «Сыбаға» бағдарламасы толты­рады деген үміт бар. Слеттің негізгі міндеті не? Ауылшаруашылық тауар өндіру­шілері мен ғалымдарды тонның ішкі бауындай араластырып, тәжірибе мен теорияны ұштас­тырып, ауыл шаруашылығын дамыту болып табылады. Жиын өз міндетін толықтай ақтады деуге болады. Ержан БАЙТІЛЕС. Қызылорда облысы.