Кеше аталмыш министрлікке қарайтын «Кәсіпқор» холдингі» коммерциялық емес акционерлік қоғамының баспасөз мәслихаты болып, елімізде үшінші жыл қатарынан өткізіліп келе жатқан WorldSkills Kazakhstan жобасы туралы кеңінен баяндалды.
Жобаның мақсаты – жұмысшы мамандықтарының мәртебесін арттыру және шеберлік дағдыларын дамыту. WorldSkills кәсіптік білімнің дамуына оң әсерін тигізеді. Оның чемпионаттары екі жылда бір рет әр мемлекетте өтеді. оған 22 жасқа дейінгі колледж және университет студенттері, білікті жас мамандар, сонымен қатар, танымал мамандар, кәсіпқойлар, өндірістік оқыту шеберлері мен тапсырмаларды орындауды бағалайтын сарапшы ретіндегі нұсқаушылар қатысады. Үміткерлер 76 қатысушы мемлекеттің өңірлік кәсіптік чемпио-
наттарынан іріктеледі. Олар өздерінің шынайылыққа барынша жақын тапсырмаларды шеше отырып, жеке және ұжымдық сапасын, техникалық қабілеттерін көрсетеді.
Командалар нәтижелері тек қатысушылардың жеке кәсіби сапасын ғана емес, сондай-ақ, жеке кәсіптік дайындық деңгейі мен қатысушылар келген елдің қызмет көрсету сапасының деңгейін де көрсетеді. 2014 жылы Қазақстан WorldSkills ассоциациясына 76-шы қатысушы мемлекет болып тіркелді. 2015 жылы Қазақстанда WorldSkills Kazakhstan Ұлттық чемпионаты өткізілді. 2016 жылғы ұлттық чемпионат нәтижесінде құрылған ұлттық құрама мүшелері EuroSkills халықаралық чемпионатына «кірпіш қалау», «құрғақ құрылыс пен сылақ жұмыстары», «плитамен қаптау», «дәнекерлеу жұмыстары», «электр-монтаж жұмыстары» бойынша қатысты. WorldSkills Kazakhstan миссиясы – кәсіптік бағдар механизмін, мамандарды даярлау және еңбек өнімділігін арттыруды қоса алғанда, халықаралық стандарттар негізінде техникалық мамандықтар бойынша өндіріс орындары саласын жоғары технологиялық мамандармен қамтамасыз ету механизмін құруға үлкен үлес қосады», деді Білім және ғылым министрлігі техникалық және кәсіптік білім департаменті халықаралық жобалар және серіктестік бағдарламасының басшысы Рауза Ширгатова.
Жиын барысында «Кәсіпқор» холдингі» коммерциялық емес акционерлік қоғамының басқарма төрағасы Нұрғали Рымғалиұлы бұл ретте холдингтің атқарып жатқан жұмыстарына да тоқталып өтті.
«Жаңа индустрияға өндірісті көтеретін, жұмыс берушілердің талабына сай келетін мамандар қажет. Сондықтан біз, біріншіден, білім берудің мазмұнына қараймыз. Себебі, өндірістегі техникалық өзгеруге байланысты мазмұн да өзгереді. Осыған байланысты білім мазмұны да содан қалмай қатар жүріп отыруы керек. Екінші – оқу-әдістемелік құралдармен толық қамту. Үшінші – сабақ беретін инженер-педагогтардың білім деңгейін көтеру және жұмыс берушілермен қоян-қолтық байланыс жасау», деді ол.
Сонымен қатар, ол дуалды оқытудың мәні мен маңызына тоқталып, кеңінен түсіндіріп өтті. «Қазіргі уақытта елімізде 400-ден астам колледж дуалды оқытумен айналысады. 2300-дей жұмыс орындары студенттердің тәжірибеден өтуіне атсалысуда. Ол білікті маман даярлауда маңызды қадам дей аламын. Сол себепті біз биылдан бастап дуалды оқытуға қатысатын жұмыс орындарына әдістемелік көмек көрсеткіміз келеді», деді Нұрғали Рымғалиұлы.
Рауан Қайдар,
«Егемен Қазақстан»
