Қауіпсіздіктің тың тетігі

Астанада Сыртқы істер министрлігінің ресми өкілі Асқар Абдрахманов дәстүрлі апталық брифингін өткізді. Онда осы аптада болатын маңызды халықаралық іс-шаралар жөнінде жан-жақты ақпарат берілді. Мәселен, бүгін Астанада еліміздің Сыртқы істер министрлігінде Еуропалық Одақтың қолдауымен «Орталық Азиядағы өлім жазасына мораторий жариялауды толық жоюға: өтпелі кезеңнің сыны» атты аймақтық конференция өтеді. «Конферен­цияның мақсаты – өлім жазасын жою үдерісін және оған өмір бойы бостандығынан айыру сияқты балама енгізген мемлекеттерде пайда болған қиын­дықтарды шешу жолдарын талқылау», – дейді ресми өкіл. Ал сәуірдің 28-і күні Қазақстанның Әділет және Сыртқы істер министрліктері, Қазақстандағы Біріккен Ұлттар Ұйымы Даму бағдарламасының тех­никалық қолдауымен «Қазақстан Республикасында Азаматтық және саяси құқықтар жөніндегі халық­аралық пакт және Әмбебап кезеңдік шолу ұсыныс­тары бойынша азаматтық және саяси құқықтарды жүзеге асыру, Қазақстанның Азаматтық және саяси құқықтар туралы халықаралық пактіні орындауы туралы Біріккен Ұлттар Ұйымының Адам құқықта­ры жөніндегі комитетінде алғашқы баяндамасын қорғау» тақырыбында дөңгелек үстел өткізілмек. Оның аясында Әмбебап кезеңдік шолу мен Адам құқықтары саласындағы ұлттық іс-қимыл жоспа­рының ұсыныстарына қатысты, сондай-ақ Азамат­тық және саяси құқықтар жөніндегі халықаралық пакт нормаларының орындалуы мен оны тиімді қолдану мәселелері талқы таразысына түспек көрінеді. Бұл күні елордада, сондай-ақ, Шанхай ынтымақ­тастық ұйымына мүше мемлекеттердің ішкі істер және қоғамдық қауіпсіздік министрлерінің екінші кездесуін өткізу көзделіп отыр екен. Оған 6 елдің құқық қорғау органдарының басшыларымен қатар, Ұйымның Хатшылығы мен Аймақтық терроризмге қарсы құрылымның жетекшілері, Ұйымға бақылау­шы (Иран, Моңғолия, Пәкстан және Үндістанның) және Сұхбат бойынша әріптес (Беларусь пен Шри Ланканың) мемлекеттердің өкілдері қатыспақ. Асқар Абдрахманов брифинг барысында 29 сәуір күні елорда төрінде ұйымдастырылатын Шанхай ынтымақтастық ұйымына мүше мемлекеттердің Қауіп­сіздік кеңесі хатшыларының 6-шы кездесуінің маңызын да жан-жақты айтты. Аталған кездесуге Қазақстан мен Ресейдің, Тәжікстан мен Өзбекстан­ның Қауіпсіздік кеңесі хатшылары, Қытайдың Мемлекеттік кеңесінің мүшесі – Қоғамдық қауіпсіздік министрі, Қырғызстанның вице-премьері – Қорға­ныс кеңесінің хатшысы, сондай-ақ, Ұйымның Хатшы­лығы мен Аймақтық терроризмге қарсы құрылымының басшылары қатысып, ШЫҰ-ның өзекті дейтін тұстарына шолу жасамақ екен. Ләйла ЕДІЛҚЫЗЫ.